وزیر خزانہ کی این آئی سی ایل کے بورڈ آف ڈائریکٹرز کی ازسرِنو تشکیل کی منظوری

کابینہ کمیٹی برائے سرکاری ملکیتی اداروں (سی سی او ایس او ایز) نے ہفتے کو نیشنل انشورنس کمپنی لمیٹڈ (این آئی سی ایل) کے بورڈ آف ڈائریکٹرز کی ازسرِنو تشکیل کی منظوری دے دی۔ وزارتِ خزانہ کے مطابق، یہ فیصلہ وزارتِ خزانہ میں منعقدہ کمیٹی کے اجلاس میں کیا گیا۔

اجلاس میں وفاقی وزیر برائے بحری امور محمد جنید انور چوہدری اور وفاقی وزیر برائے تجارت جام کمال خان نے بھی شرکت کی۔

وزارتِ خزانہ کے بیان کے مطابق، ’’کمیٹی نے نیشنل انشورنس کمپنی لمیٹڈ کے بورڈ آف ڈائریکٹرز کی ازسرِنو تشکیل سے متعلق وزارتِ تجارت کی جانب سے پیش کردہ سمری کا جائزہ لیا۔ کمیٹی نے سرکاری ملکیتی اداروں کے ایکٹ 2023 اور پالیسی 2023 کے مطابق دو آزاد اور چار عہدے کی بنیاد پر شامل ہونے والے ڈائریکٹرز سمیت مجوزہ نامزدگیوں کی منظوری دے دی۔‘‘

اورنگزیب عالمی بینک گروپ اور آئی ایم ایف کے سالانہ اجلاسوں میں شرکت کے لیے بنکاک روانہ

وزارتِ خزانہ کے ایک الگ بیان کے مطابق، وزیر خزانہ محمد اورنگزیب ہفتے کو تھائی لینڈ کے دارالحکومت بنکاک روانہ ہوگئے، جہاں وہ 12 سے 18 اکتوبر 2026 تک منعقد ہونے والے عالمی بینک گروپ اور آئی ایم ایف کے سالانہ اجلاسوں میں پاکستانی وفد کی قیادت کریں گے۔

بیان میں کہا گیا کہ دورے کے دوران وزیر خزانہ بین الاقوامی مالیاتی فنڈ (آئی ایم ایف) اور عالمی بینک گروپ کی اہم تقریبات میں پاکستان کی نمائندگی کریں گے۔ وہ بین الاقوامی مالیاتی اداروں، وزرائے خزانہ، پالیسی سازوں، ترقیاتی شراکت داروں، عالمی سرمایہ کاروں، بینکوں، کریڈٹ ریٹنگ ایجنسیوں، تحقیقی اداروں اور بین الاقوامی ذرائع ابلاغ کے نمائندوں کے ساتھ 60 سے زائد اعلیٰ سطح کی ملاقاتوں اور دیگر سرگرمیوں میں بھی حصہ لیں گے۔

وزارتِ خزانہ کے مطابق، یہ دورہ ایسے وقت میں ہورہا ہے جب پاکستان معاشی استحکام کے مرحلے سے آگے بڑھتے ہوئے پائیدار ترقی کی جانب گامزن ہے، جس میں سرمایہ کاری اور برآمدات کو بنیادی محرک بنایا جارہا ہے۔ اس دوران ساختی اصلاحات کو آگے بڑھانے اور عالمی سرمایہ منڈیوں اور ترقیاتی شراکت داروں کے ساتھ روابط مضبوط بنانے پر بھی توجہ دی جارہی ہے۔

وزیر خزانہ آئی ایم ایف اور عالمی بینک گروپ کی قیادت سے بھی ملاقاتیں کریں گے، جن میں انٹرنیشنل فنانس کارپوریشن (آئی ایف سی) اور ملٹی لیٹرل انویسٹمنٹ گارنٹی ایجنسی (میگا) کے حکام شامل ہوں گے۔ ان ملاقاتوں میں پاکستان کے معاشی منظرنامے، اصلاحات پر پیش رفت، نجی شعبے کی ترقی اور مستقبل میں تعاون کے امکانات پر تبادلہ خیال کیا جائے گا۔

وزارتِ خزانہ کے مطابق، اورنگزیب مشرق وسطیٰ، شمالی افریقا، افغانستان اور پاکستان (میناپ) خطے کے وزرائے خزانہ، مرکزی بینکوں کے گورنرز اور علاقائی مالیاتی اداروں کے سربراہان کے ساتھ آئی ایم ایف کی منیجنگ ڈائریکٹر کے اجلاس میں بھی شرکت کریں گے۔