آسٹریلوی اوپنر ٹریوس ہیڈ نے ٹیم پر تنقید کرنے والوں کو آڑے ہاتھوں لے لیا

آسٹریلوی اوپنر ٹریوس ہیڈ نے جنوبی افریقہ کے خلاف پہلے ٹیسٹ سے قبل موجودہ ٹیم پر تنقید کرنے والے سابق کھلاڑیوں کو آڑے ہاتھوں لیا ہے۔ آسٹریلیا اور جنوبی افریقہ کے درمیان پہلا ٹیسٹ جمعے سے ڈربن میں شروع ہوگا۔

ٹریوس ہیڈ نے کسی سابق کھلاڑی کا نام لیے بغیر کہا کہ ماضی کے بعض کھلاڑی موجودہ ٹیم کے کئی ارکان پر سخت تنقید کرکے انہیں غیرضروری دباؤ میں ڈال رہے ہیں، جو ان کے خیال میں ناانصافی ہے۔ انہوں نے کہا کہ ناقدین کا کام ہی تنقید کرنا ہے اور ٹیم اس نوعیت کی آرا سے نمٹنے کی صلاحیت رکھتی ہے۔

سابق آسٹریلوی بیٹر میتھیو ہیڈن نے حال ہی میں سلیکٹرز پر سخت تنقید کرتے ہوئے فرسٹ کلاس کرکٹ سے ناانصافی کا الزام عائد کیا تھا۔ ان کی تنقید نِک میڈنسن کی ٹیسٹ اسکواڈ میں واپسی کے حوالے سے تھی، جو تقریباً 10 سال بعد دوبارہ ٹیم میں شامل ہوئے ہیں۔

ٹریوس ہیڈ نے میڈنسن کی صلاحیتوں کا دفاع کرتے ہوئے کہا کہ ٹیسٹ کرکٹ میں تجربہ کار کھلاڑیوں کی ضرورت ہوتی ہے۔ انہوں نے ماضی کی مثال دیتے ہوئے کہا کہ آسٹریلیا نے مائیک ہسی جیسے تجربہ کار کھلاڑیوں کو موقع دے کر کامیابیاں حاصل کیں۔