یمن کے حوثیوں سے لڑائی میں شدت، سعودی عرب کے دو ایئرپورٹس پر حملے

سعودی عرب کے جازان اور نجران کے ایئرپورٹس کو پیر کی شام دو الگ حملوں میں نشانہ بنایا گیا، جس کے نتیجے میں 3 افراد زخمی اور محدود نقصان ہوا۔ سعودی ہوا بازی کے حکام نے بتایا کہ یہ حملے ایسے وقت میں ہوئے ہیں جب سعودی عرب اور یمن کے حوثی باغیوں کے درمیان کشیدگی میں مزید اضافہ ہوگیا ہے۔

حملے ایک ایسے وقت میں کیے گئے جب سعودی عرب کی حمایت یافتہ یمنی حکومتی فورسز حوثیوں سے علاقے واپس لینے کے لیے بڑے فوجی آپریشن میں مصروف ہیں۔ حوثیوں کی جانب سے کئی ہفتوں تک پیش قدمی کے بعد ریاض نے اس مہم کی حمایت میں اپنے فضائی حملوں میں بھی اضافہ کردیا ہے۔

حوثیوں نے جواباً سعودی عرب میں میزائل اور ڈرون حملے کیے ہیں، جن میں ایئرپورٹس، تیل کی تنصیبات اور فوجی مقامات کو نشانہ بنایا گیا۔

سعودی عرب کی جنرل اتھارٹی آف سول ایوی ایشن نے کہا کہ حکام کنگ عبداللہ بن عبدالعزیز انٹرنیشنل ایئرپورٹ اور نجران انٹرنیشنل ایئرپورٹ کو پہنچنے والے نقصان کا جائزہ لے رہے ہیں۔

اتھارٹی کے مطابق مسافروں اور عملے کی حفاظت یقینی بنانے کے لیے ضروری اقدامات کیے جارہے ہیں، جبکہ سعودی عرب کے سول ایوی ایشن نظام کی سکیورٹی بھی یقینی بنائی جارہی ہے۔

سعودی حکام نے حملوں کے بعد ہوائی اڈوں پر حفاظتی اقدامات مزید سخت کردیے ہیں۔