آبنائے ہرمز میں دو آئل ٹینکرز پر حملہ

برطانوی میری ٹائم ایجنسی کے مطابق آبنائے ہرمز کے علاقے میں دو تیل کے ٹینکرز کو نامعلوم پراجیکٹائلز (میزائلوں/گولوں) نے نشانہ بنایا ہے۔

آبنائے ہرمز جہاں سے فروری کے اواخر میں امریکا اور اسرائیل کی جانب سے ایران پر حملے شروع کیے جانے اور مشرقِ وسطیٰ میں جنگ چھڑنے سے قبل دنیا کے پانچویں حصے کے برابر تیل اور ایل این جی کی ترسیل ہوتی تھی، بدستور اس تنازع کا مرکز ہے۔

تہران تجارتی بحری جہازوں کی گزرگاہ میں رکاوٹیں کھڑی کر رہا ہے اور ان جہازوں پر فائرنگ کر رہا ہے جن پر وہ غیر مجاز گزرنے کا الزام عائد کرتا ہے۔

واشنگٹن نے ایران کو تیل برآمد کرنے سے روکنے کی کوشش میں ایرانی بندرگاہوں کی جوابی ناکہ بندی شروع کر دی ہے۔

برطانوی میری ٹائم ٹریڈ آپریشنز ایجنسی (یو کے ایم ٹی او) نے جمعہ کو بتایا کہ پہلے حملے کے نتیجے میں جہاز پر معمولی آگ بھڑک اٹھی اور بجلی کی فراہمی معطل ہوگئی، تاہم بعد میں آگ پر قابو پا لیا گیا۔

ایجنسی نے مزید بتایا کہ کسی جانی نقصان کی اطلاع نہیں ملی۔

یو کے ایم ٹی او کے مطابق آبنائے ہرمز سے باہر نکلنے والے مذکورہ جہاز نے اپنا سفر دوبارہ شروع کر دیا، تاہم ایجنسی نے جہاز کی روانگی اور منزل کی بندرگاہوں کے بارے میں تفصیلات فراہم نہیں کیں۔

چند گھنٹے بعد ایک اور خام تیل بردار ٹینکر نے عمان کے مشرق میں نامعلوم پروجیکٹائل سے نشانہ بنائے جانے کی اطلاع دی۔ برطانوی میری ٹائم ٹریڈ آپریشنز ایجنسی کے مطابق جہاز کا تمام عملہ محفوظ رہا اور ماحولیاتی نقصان کی بھی کوئی اطلاع نہیں ملی۔

ایجنسی نے بتایا کہ حکام ان واقعات کی تحقیقات کررہے ہیں۔