ملائیشیا کا پاکستانی چاول کی برآمدات بڑھانے پر اتفاق

کوالالمپور میں اعلیٰ سطح کے اجلاسوں کے دوران پاکستان اور ملائیشیا نے چاول کی برآمدات، حلال سرٹیفکیشن کے معیارات اور غذائی تحفظ کے شعبوں میں دوطرفہ تعاون مزید مضبوط بنانے پر تبادلہ خیال کیا۔

وفاقی سیکریٹری قومی غذائی تحفظ و تحقیق عامر علی احمد، وفاقی سیکریٹری تجارت جواد پال اور ملائیشیا میں پاکستان کے ہائی کمشنر سید احسن رضا شاہ نے برناس کے گروپ چیف ایگزیکٹو داتو ڈاکٹر سراج الدین بن سہیمی، جاکم کے ڈائریکٹر جنرل اور ملائیشیا کی وزارت زراعت و غذائی تحفظ کے سیکریٹری جنرل داتوک سری اشام بن اشاق سے ملاقاتیں کیں۔

برناس کی انتظامیہ سے ملاقات میں پاکستان سے ملائیشیا کو چاول کی برآمدات بڑھانے کے امکانات کا جائزہ لیا گیا۔ فریقین نے برناس کے معیار اور تقاضوں پر سختی سے عمل درآمد یقینی بنانے کی ضرورت پر زور دیا۔ اجلاس میں ملائیشیا انٹرنیشنل حلال شوکیس میں پاکستان کی شرکت اور دونوں ممالک کے درمیان تجارتی روابط مزید مستحکم کرنے کے عزم کا بھی اعادہ کیا گیا۔

جاکم کے ڈائریکٹر جنرل داتو ڈاکٹر سراج الدین بن سہیمی سے ملاقات میں حلال سرٹیفکیشن کے معیارات، سپلائی چین، مارکیٹ تک رسائی اور حلال زرعی و غذائی مصنوعات کی تجارت بڑھانے پر گفتگو ہوئی۔ فریقین نے اکتوبر میں جاکم اور پاکستان حلال اتھارٹی کے درمیان طے پانے والے مفاہمتی یادداشت پر پیش رفت کا بھی جائزہ لیا۔

ملائیشیا کی وزارت زراعت و غذائی تحفظ کے سیکریٹری جنرل سے ملاقات میں چاول، گوشت، پولٹری، ماہی گیری، آبی زراعت کی ٹیکنالوجی، جانوروں کی ویکسین، حیاتیاتی تحفظ اور حلال جیلاٹن کی فراہمی سمیت مختلف شعبوں میں تعاون پر تبادلہ خیال کیا گیا۔

دونوں ممالک نے زرعی تجارت، تکنیکی تعاون اور معلومات کے تبادلے کے لیے ادارہ جاتی روابط مضبوط بنانے پر اتفاق کیا۔ اس مقصد کے لیے مسلسل رابطے کا باضابطہ طریقہ کار قائم کرنے اور رواں سال نومبر میں مشترکہ آن لائن اجلاس منعقد کرنے پر بھی اتفاق کیا گیا۔

اجلاسوں میں پاکستان اور ملائیشیا کے درمیان زرعی شراکت داری، دوطرفہ تجارت اور محفوظ، معیاری و حلال غذائی مصنوعات کے فروغ کے عزم کا اعادہ کیا گیا۔