سازگار کا پاکستان میں بی اے آئی سی کی آرک فاکس الیکٹرک گاڑیاں لانے کا منصوبہ

سازگار انجینئرنگ ورکس لمیٹڈ نے چین کے بی اے آئی سی گروپ (BAIC Group) کے پریمیم الیکٹرک وہیکل برانڈ آرک فاکس (ARCFOX) کو پاکستان میں متعارف کرانے کا منصوبہ بنایا ہے جس سے کمپنی اپنے نیو انرجی وہیکل پورٹ فولیو کو مزید وسعت دے گی۔

لسٹڈ کمپنی نے جمعہ کو پاکستان اسٹاک ایکسچینج میں جمع کرائی گئی اپنی فائلنگ کے ذریعے اس پیشرفت سے آگاہ کیا۔

کمپنی نے ایک نوٹس میں کہا کہ ہمیں یہ بتاتے ہوئے خوشی ہورہی ہے کہ سازگار انجینئرنگ ورکس لمیٹڈ (کمپنی) پاکستان میں آرک فاکس نیو انرجی وہیکلز (این ای ویز) متعارف کرانے کا ارادہ رکھتی ہے جس سے اس کی نیو انرجی وہیکلز کی مصنوعات کے پورٹ فولیو میں مزید توسیع ہوگی۔

کمپنی کے مطابق آرک فاکس بی اے آئی سی گروپ کے اعلیٰ معیار کی الیکٹرک گاڑیوں کا برانڈ ہے۔ یہ جدید ڈیزائن اور جدید ٹیکنالوجی کو یکجا کرتا ہے جبکہ اس کی انجینئرنگ اور ٹیکنالوجی کے شعبوں میں میگنا اور ہواوے کے ساتھ اشتراک بھی شامل ہے،

سازگار انجینئرنگ ورکس لمیٹڈ کو 1991 میں پاکستان میں ایک پرائیویٹ لمیٹڈ کمپنی کے طور پر قائم کیا گیا جبکہ 1994 میں اسے پبلک لمیٹڈ کمپنی کا درجہ دے دیا گیا۔ کمپنی کا بنیادی کاروبار گاڑیوں، آٹو موٹیو پرزہ جات اور لوازمات اور گھریلو الیکٹرانک آلات کی تیاری اور فروخت ہے۔ کمپنی کے پیداواری پلانٹس لاہور میں واقع ہیں۔

سازگار کے مصنوعات کے پورٹ فولیو میں آٹو رکشے، ٹریکٹر کے پہیے کے رم اور گھریلو برقی آلات شامل ہیں۔ حالیہ برسوں میں کمپنی نے فور وہیلر گاڑیوں کے شعبے میں داخل ہو کر نمایاں توسیع کی اور ایس یو ویز متعارف کرائیں۔

2022 میں کمپنی نے BAIC برانڈ کے تحت اپنی پہلی فور وہیلر گاڑی متعارف کرائی۔

2023 تک کمپنی نے ایس یو وی گاڑیوں کی پیداوار شروع کر دی اور مقامی مارکیٹ میں HAVAL برانڈ کے تحت ہائبرڈ الیکٹرک گاڑیاں بھی متعارف کرائیں۔

کمپنی نے اپنی پہلی مقامی طور پر اسمبل کی گئی ہائبرڈ الیکٹرک گاڑی بھی لانچ کی۔