فیڈ کی پالیسی سخت ہونے کے امکانات، سونے کی قیمتیں دبائو کا شکار

عالمی سطح پر سونے کی قیمتیں جمعرات کو تقریباً مستحکم رہیں، تاہم امریکی فیڈرل ریزرو کی جانب سے مزید شرح سود میں اضافے کے امکانات نے قیمتوں پر دباؤ برقرار رکھا۔ دوسری جانب تیل کی قیمتوں میں کمی نے سونے کو کچھ سہارا فراہم کیا۔

اسپاٹ گولڈ کی قیمت 0.1 فیصد کمی سے 4,281.98 ڈالر فی اونس ہوگئی، جبکہ دسمبر کی ڈیلیوری کے لیے امریکی گولڈ فیوچرز 4,317.50 ڈالر فی اونس پر معمولی تبدیلی کے ساتھ رہے۔

وی ٹی مارکیٹس کے چیف اسٹریٹیجی آفیسر راس میکسویل نے کہا کہ سرمایہ کار گزشتہ ہفتے شرح سود میں اضافے کے بعد فیڈ کے بلند شرح سود کو طویل عرصے تک برقرار رکھنے کے مؤقف، امریکی ڈالر اور ٹریژری ییلڈز میں اتار چڑھاؤ اور تیل و توانائی کی فراہمی کے خطرات سے متعلق مشرق وسطیٰ کی پیش رفت پر توجہ مرکوز کیے ہوئے ہیں۔

انہوں نے کہا کہ مزید شرح سود میں اضافے کا واضح اشارہ سونے کی قیمت کو مزید نیچے لے جا سکتا ہے۔

امریکی مرکزی بینک نے گزشتہ ہفتے بنیادی شرح سود میں 25 بیسس پوائنٹس کا اضافہ کرکے اسے 3.75 سے 4 فیصد کردیا تھا۔ بڑھتے ہوئے افراط زر کے دباؤ اور مضبوط ہوتی معیشت کے باعث اکتوبر کے آخر میں شرح سود میں ایک اور اضافے کے امکانات بڑھ گئے ہیں۔

سونا عام طور پر افراط زر کے خلاف تحفظ سمجھا جاتا ہے، تاہم شرح سود میں اضافہ سود دینے والی سرمایہ کاری کے مقابلے میں سونے کی کشش کم کردیتا ہے۔

دریں اثنا، اسپاٹ سلور 0.6 فیصد کمی سے 64.07 ڈالر، پلاٹینم 0.2 فیصد اضافے سے 1,754.05 ڈالر جبکہ پیلاڈیم 0.1 فیصد کمی سے 1,260.70 ڈالر فی اونس ہوگیا۔