ٹی سی پی کو گندم کی درآمد کے لیے نو بولیاں موصول

ٹریڈنگ کارپوریشن آف پاکستان (ٹی سی پی) کو ملکی کھپت کیلئے 750,000 میٹرک ٹن کی ٹینڈر مقدار کے مقابلے میں 6 لاکھ 56 ہزار میٹرک ٹن گندم درآمد کرنے کیلئے 9 قابلِ قبول بولیاں موصول ہوئی ہیں جن کی قیمت 348.83 ڈالر سے 369.95 ڈالر فی میٹرک ٹن تک ہے۔

مجموعی طور پر تقریباً 13 فریقوں نے ٹینڈر میں حصہ لیا جن میں سے دو بولی دہندگان نے معذرت کے خطوط جمع کرائے، 9 بولیاں تکنیکی اور مالی اعتبار سے موزوں قرار پائیں جبکہ دو بولیاں غیر موزوں قرار دی گئیں۔

وفاقی حکومت کی ہدایات پر سرکاری غلہ درآمد کنندہ ادارے نے 8 ستمبر 2026 کو بین الاقوامی ٹینڈر جاری کرتے ہوئے عالمی گندم سپلائرز سے 7 لاکھ 50 ہزار میٹرک ٹن گندم کی فراہمی کے لیے سیل شدہ بولیاں طلب کیں۔ ٹینڈر کے تحت مقدار میں 10 فیصد کمی بیشی کی گنجائش رکھی گئی تھی جبکہ گندم بلک میں سی ایف آر (لاگت اور مال برداری) بنیاد پر کراچی یا گوادر بندرگاہ پہنچانا تھی۔

مقامی گندم کی پیداوار طلب سے کم رہنے کے خدشے کے پیش نظر وفاقی حکومت نے صوبوں کی درخواست پر مقامی مارکیٹ میں ممکنہ قلت سے بچنے کے لیے تقریباً 7 لاکھ 50 ہزار میٹرک ٹن گندم درآمد کرنے کا منصوبہ بنایا ہے۔

گندم کی درآمد کے لیے پہلا ٹینڈر بدھ کو ٹی سی پی ہیڈ آفس میں کھولا گیا۔ ٹینڈر کے جواب میں تقریباً 9 بین الاقوامی سپلائرز نے مجموعی طور پر 6 لاکھ 56 ہزار میٹرک ٹن گندم کی فراہمی کے لیے 348.83 ڈالر سے 369.95 ڈالر فی میٹرک ٹن کی قیمتوں پر بولیاں جمع کرائیں جو 7 لاکھ 50 ہزار میٹرک ٹن کے ہدف سے کم مقدار ہے۔

سب سے کم بولی میسرز ایگروکارپ نے 55 ہزار میٹرک ٹن گندم کی فراہمی کے لیے 348.83 ڈالر فی میٹرک ٹن کی قیمت پر دی۔ دوسری کم ترین بولی میسرز ایل ڈی سی نے 1 لاکھ 10 ہزار میٹرک ٹن گندم کی فراہمی کے لیے 349.97 ڈالر فی میٹرک ٹن کی قیمت پر جمع کرائی۔ میسرز بنگ گلوبل نے 1 لاکھ 16 ہزار میٹرک ٹن گندم کی فراہمی کے لیے 356.86 ڈالر فی میٹرک ٹن، میسرز فالکن برج نے 50 ہزار میٹرک ٹن کے لیے 357.49 ڈالر فی میٹرک ٹن جبکہ میسرز سوفلیٹ نے 1 لاکھ 10 ہزار میٹرک ٹن کی فراہمی کے لیے 357.70 ڈالر فی میٹرک ٹن کی بولی دی۔

اس کے علاوہ میسرز آسٹن نے 50 ہزار میٹرک ٹن گندم کی فراہمی کے لیے 360 ڈالر فی میٹرک ٹن، میسرز امیروپا نے 55 ہزار میٹرک ٹن کے لیے 363.74 ڈالر فی میٹرک ٹن جبکہ میسرز سی ایچ ایس نے 55 ہزار میٹرک ٹن گندم کی فراہمی کے لیے 364.50 ڈالر فی میٹرک ٹن کی بولی جمع کرائی۔ سب سے زیادہ بولی میسرز اولام کی جانب سے موصول ہوئی جس نے 55 ہزار میٹرک ٹن گندم کی فراہمی کے لیے 369.95 ڈالر فی میٹرک ٹن کی قیمت پیش کی۔

فی الحال ٹی سی پی بولیوں کی جانچ پڑتال کے عمل میں ہے۔ ٹینڈر کی شرائط و ضوابط کے مطابق دلچسپی رکھنے والے بولی دہندگان کے لیے کم از کم 50 ہزار میٹرک ٹن گندم کی مقدار کے لیے بولی دینا ضروری تھا۔

کاپی رائٹ بزنس ریکارڈر 2026