سپرنیٹ ٹیکنالوجیز: 915 ملین روپے کے رائٹس ایشو کو 98.16 فیصد سبسکرپشن حاصل

سپرنیٹ ٹیکنالوجیز لمیٹڈ (پی ایس ایکس: ایس ٹی ایل) کو تقریباً 914.77 ملین روپے کے رائٹس ایشو کے مقابلے میں تقریباً 898 ملین روپے کی سبسکرپشن موصول ہوئی جو 98.16 فیصد کی سبسکرپشن شرح کو ظاہر کرتی ہے۔

پاکستان اسٹاک ایکسچینج میں پیر کو جمع کرائے گئے ایک نوٹس کے مطابق سبسکریبشن کا عمل مکمل ہونے کے بعد رائٹس ایشو کا صرف 1.84 فیصد حصہ ایسا تھا جس کے لیے سبسکریبشن موصول نہیں ہو سکی تھی۔

کمپنی نے تقریباً 915 ملین روپے کے حصول کے لیے 10 روپے فی شیئر کے حساب سے 85 فیصد رائٹس ایشو کا اعلان کیا تھا۔

اس سے حاصل ہونے والی رقم بنیادی طور پر ایس ٹی ایل کے ورکنگ کیپٹل کی پوزیشن مضبوط بنانے، بڑے اور بڑھتی ورکنگ کیپٹل کی ضرورت رکھنے والے منصوبوں پر عمل درآمد میں معاونت فراہم کرنے اور ٹیلی کارڈ لمیٹڈ کے ساتھ شیئر پرچیز ایگریمنٹ کے تحت قابلِ ادائیگی رقم کے ایک حصے کی ادائیگی کے لیے استعمال کی جائے گی۔

سپرنیٹ ٹیکنالوجیز ٹیلی کمیونیکیشن انفرااسٹرکچر، انفارمیشن ٹیکنالوجی، سائبر سیکیورٹی اور متعلقہ ٹیکنالوجی سلوشنز کے شعبوں میں اپنی خدمات اور کاروباری پورٹ فولیو کو مسلسل وسعت دے رہی ہے۔

اضافی سرمایہ کمپنی کی بڑے منصوبوں پر عمل درآمد کے لیے مالی استعداد بڑھانے اور مستقبل میں کاروباری ترقی کو فروغ دینے میں معاون ثابت ہونے کی توقع ہے۔

کمپنی کی آمدنی کے مجموعی ڈھانچے میں گزشتہ چند برسوں کے دوران نمایاں تبدیلی دیکھی گئی ہے جس کے تحت غیر سروس آمدنی مالی سال 2021ء میں تقریباً 682 ملین روپے سے بڑھ کر مالی سال 2025ء میں 5 ارب روپے سے تجاوز کر گئی۔ اسی دوران مالی سال 2025ء میں کمپنی کے سروسز کاروبار سے بھی 4.2 ارب روپے سے زائد کی آمدنی حاصل ہوئی جس کے نتیجے میں کمپنی کی مجموعی سالانہ آمدنی تقریباً 9.2 ارب روپے تک پہنچ گئی۔

ایس ٹی ایل نے ٹیکنالوجی اور سائبر سیکیورٹی کے شعبوں میں کئی بڑے منصوبے بھی حاصل کیے جن میں حال ہی میں تقریباً ایک ارب روپے مالیت کا ہارڈویئر اور سروسز منصوبہ بھی شامل ہے جس پر مالی سال 2026ء اور مالی سال 2027ء کے دوران عمل درآمد متوقع ہے۔