پی ٹی اے نے ٹیلی کام آلات کے معیارات سے متعلق ضوابط نافذ کردیے

پاکستان ٹیلی کمیونیکیشن اتھارٹی (پی ٹی اے) نے ٹیلی کمیونیکیشن آلات کے معیارات سے متعلق ضوابط 2024 نافذ کردیے ہیں، جن کے تحت ملک میں تیار، درآمد یا نصب کیے جانے والے ٹیلی کام آلات کے لیے مقررہ تکنیکی معیارات پر عمل درآمد لازمی قرار دے دیا گیا ہے۔

پی ٹی اے نے منگل کو جاری کردہ ایک بیان میں کہا کہ وفاقی حکومت کی منظوری کے بعد یہ ضوابط پاکستان گزٹ میں ایس آر او 1110(1)/2026 کے تحت جاری کیے گئے ہیں۔

پاکستان ٹیلی کمیونیکیشن (تنظیمِ نو) ایکٹ 1996 کی دفعہ 28 کے تحت جاری کیے گئے یہ ضوابط پی ٹی اے کے تمام لائسنس یافتگان، ٹیلی کمیونیکیشن آلات کے تیار کنندگان اور درآمد کنندگان پر لاگو ہوں گے۔

نئے ضوابط کے تحت ٹیلی کام آلات کے لیے مقررہ تکنیکی معیارات پر پورا اترنا لازمی ہوگا، جن میں برقی مقناطیسی مطابقت (ای ایم سی)، ریڈیو فریکوئنسی (آر ایف)، صحت و سلامتی اور دیگر قابلِ اطلاق تکنیکی تقاضے شامل ہیں۔

آلات کی درآمد، تنصیب یا عملی استعمال سے قبل پی ٹی اے کی جانب سے جاری کردہ تعمیل کا سرٹیفکیٹ (سی او سی) حاصل کرنا لازمی ہوگا۔

یہ ضوابط درآمد کنندگان، لائسنس یافتگان، تیار کنندگان، وینڈرز اور صنعت کے دیگر نمائندوں سے مشاورت کے بعد تیار کیے گئے ہیں۔

پی ٹی اے کے مطابق اس ضابطۂ کار کا مقصد عالمی سطح پر مطابقت اور باہمی اتصال کو فروغ دینا، خدمات کے معیار کو بہتر بنانا، مقامی سطح پر ٹیلی کام آلات کی تیاری کی حوصلہ افزائی اور قومی اقتصادی ترقی میں معاونت فراہم کرنا ہے۔

اتھارٹی نے کہا کہ ان ضوابط سے پاکستان کے ٹیلی کمیونیکیشن نظام کو مزید مستحکم کرنے اور اس شعبے میں ٹیکنالوجی کے فروغ میں بھی مدد ملے گی۔