ڈالر کے مقابلے میں روپے کی پیش قدمی جاری

انٹربینک مارکیٹ میں پیر کو ڈالر کے مقابلے روپے کی قدر میں بہتری کا سلسلہ جاری ہے۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 277.47 روپے پر بند ہوا۔

یاد رہے کہ جمعہ کو مقامی کرنسی 277.50 روپے پر بند ہوئی تھی۔

دریں اثنا پیر کو ڈالر دو ہفتے کی بلند ترین سطح کے قریب مستحکم رہا کیونکہ فیڈرل ریزرو کے چیئرمین کیون وارش کے سخت گیر ریمارکس کے بعد مارکیٹوں نے شرح سود میں اضافے کی توقعات بڑھا دیں جبکہ ین دوبارہ 160 ین فی ڈالر کی اہم سطح سے نیچے چلا گیا۔

یورو 0.1 فیصد معمولی اضافے کے ساتھ 1.1591 ڈالر پر پہنچ گیا جبکہ پاؤنڈ اسٹرلنگ 1.3539 ڈالر پر معمولی تبدیلی کے ساتھ رہا۔ دونوں کرنسیاں مسلسل دوسرے ماہانہ اضافے کی جانب گامزن رہیں۔

ڈالر انڈیکس معمولی کمی کے ساتھ 99.6 پر آگیا جبکہ جمعہ کو اس میں 0.6 فیصد اضافہ ہوا تھا اور یہ 17 اگست کے بعد بلند ترین سطح پر پہنچ گیا تھا۔

اس کے باوجود ڈالر انڈیکس مسلسل دوسرے ماہانہ گراوٹ کی جانب گامزن تھا، کیونکہ رواں ماہ کے اوائل میں امریکی محکمہ خزانہ کے بانڈز کی دوبارہ خریداری کے منصوبوں نے کرنسی کی قدر میں کمی سے متعلق سرمایہ کاری کی سرگرمیوں کو دوبارہ متحرک کردیا۔

مزید برآں پیر کو تیل کی قیمتیں 2 فیصد سے زیادہ اضافے کے ساتھ کاروبار کر رہی تھیں۔