شمالی سوئٹزرلینڈ میں فائرنگ، متعدد افراد متاثر ہوئے، پولیس

سوئٹزرلینڈ کے شمالی علاقے میں اتوار کی صبح سویرے ایک تقریب کے دوران فائرنگ کا واقعہ پیش آیا، جس کے نتیجے میں متعدد افراد کے متاثر ہونے کی اطلاعات ہیں۔

آرگاؤ کینٹونل پولیس کے مطابق واقعے کے بعد بڑے پیمانے پر کارروائی جاری ہے۔ پولیس نے عوام سے اپیل کی ہے کہ اگر کسی کے پاس واقعے کی ویڈیو یا تصاویر موجود ہوں تو وہ حکام کو فراہم کریں۔

کثیر الاشاعت اخبار بلک نے بتایا کہ فائرنگ کا واقعہ ایک ریو پارٹی کے دوران پیش آیا۔

اخبار نے ایک بلند مقام سے بنائی گئی ویڈیو بھی شائع کی، جس کے بارے میں اس کا کہنا تھا کہ یہ ایک قاری نے فراہم کی ہے۔ ویڈیو میں رات کے وقت سڑک کا منظر دکھائی دیتا ہے جبکہ متعدد گولیاں چلنے کی آوازیں بھی سنائی دیتی ہیں۔

واقعے کے حوالے سے فوری طور پر مزید تفصیلات سامنے نہیں آسکیں۔