پی اے اے اور پی ایس ڈبلیو کا جناح انٹرنیشنل ایئرپورٹ پر ڈیجیٹل کارگو چارجز سسٹم شروع کرنے کا فیصلہ

پاکستان ایئرپورٹس اتھارٹی (پی اے اے) اور پاکستان سنگل ونڈو (پی ایس ڈبلیو) 27 اگست سے جناح انٹرنیشنل ایئرپورٹ کراچی پر کارگو تھروپٹ چارجز (سی ٹی سی) کی وصولی کے لیے ڈیجیٹل نظام متعارف کرائیں گے جس کے تحت دستی اور کاغذی طریقہ کار کو الیکٹرانک ادائیگیوں اور خودکار تصدیق کے نظام سے تبدیل کردیا جائے گا۔

منگل کو جاری کردہ ایک بیان کے مطابق یہ پیشرفت پاکستان ایئرپورٹس اتھارٹی (پی اے اے ) اور پاکستان سنگل ونڈو (پی ایس ڈبلیو) کے درمیان ایک مفاہمتی یادداشت پر دستخط کے بعد سامنے آئی جس کے تحت فضائی درآمدی کھیپ پر کارگو تھروپٹ چارجز کی وصولی کو ڈیجیٹل بنایا جائے گا۔

پاکستان ایئرپورٹس اتھارٹی کی جانب سے ڈائریکٹر کمرشل عبدالباسط نے مفاہمتی یادداشت پر دستخط کیے جب کہ پاکستان سنگل ونڈو کی جانب سے چیف ڈومین آفیسر نوید عباس میمن نے دستخط کیے۔

بیان میں کہا گیا کہ اس اقدام کا مقصد سی ٹی سی کی ادائیگیوں کو پی ایس ڈبلیو پلیٹ فارم کے ساتھ مربوط کرنا ہے جس کے تحت دستی اور کاغذی طریقہ کار کو ایک مربوط ڈیجیٹل نظام سے تبدیل کردیا جائے گا۔ اس نظام کے ذریعے الیکٹرانک ادائیگیوں، دستاویزات کی خودکار تصدیق اور سی ٹی سی کی وصولیوں کی حقیقی وقت میں نگرانی کی سہولت میسر ہوگی۔

بیان کے مطابق ڈیجیٹل سی ٹی سی وصولی کے نظام سے کاغذی کارروائی، بینکوں کے چکر اور قطاروں میں انتظار میں کمی آنے کی توقع ہے جبکہ وصولی کے عمل میں شفافیت اور کارکردگی بھی بہتر ہوگی۔

بیان میں مزید کہا گیا کہ پی ایس ڈبلیو اور پی اے اے کے درمیان یہ تعاون حکومتِ پاکستان کی ڈیجیٹلائزیشن پالیسی سے ہم آہنگ ہے اور پاکستان کے ایئر کارگو نظام کو جدید بنانے اور تجارت کو آسان بنانے کی جانب ایک اہم قدم ہے۔