ایوانسیون نے پاکستان کی بڑی آئل مارکیٹنگ کمپنیوں سے 63 لاکھ ڈالر کے فیول ریٹیل آرڈرز حاصل کرلیے

پاکستانی ٹیکنالوجی کمپنی ایوانسیون لمیٹڈ (اے وی این) نے اعلان کیا ہے کہ اسے پاکستان کی بڑی آئل مارکیٹنگ کمپنیوں سے فیول ریٹیل کاروبار کے لیے 63 لاکھ ڈالر مالیت کے آرڈرز حاصل ہوگئے ہیں۔

کمپنی نے آج پاکستان اسٹاک ایکسچینج کو جاری کردہ نوٹس میں بتایا کہ یہ منصوبے فیول ریٹیل اور ڈاؤن اسٹریم انرجی سیکٹر کے لیے آٹومیشن، آٹومیٹک ٹینک گیجنگ (اے ٹی جی) سسٹمز اور ڈیجیٹلائزیشن کے شعبے میں ایک قابلِ اعتماد شراکت دار کی حیثیت سے ایوانسیون کے کردار کو مزید مضبوط کرتے ہیں۔

کمپنی کے مطابق ان منصوبوں سے گروپ کے کاروبار اور شیئر ہولڈرز کے لیے قدر میں اضافے کے مثبت امکانات پیدا ہوں گے۔

ایوانسیون نے کہا کہ پاکستان میں 10 ہزار سے زائد فیول اسٹیشنز کی مارکیٹ میں اب بھی آٹومیشن کی وسیع گنجائش موجود ہے، جس کے باعث نئے سسٹمز کی تنصیب، اپ گریڈز، ریگولیٹری تقاضوں کی تکمیل، ریموٹ مانیٹرنگ، ڈیجیٹل فیول مینجمنٹ اور لائف سائیکل سروسز کے ذریعے مسلسل ترقی کے امکانات روشن ہیں۔

کمپنی نے مزید کہا کہ اس کے نصب شدہ سسٹمز کے بڑھتے ہوئے دائرہ کار سے پریوینٹیو اور کریکٹیو مینٹیننس، سافٹ ویئر، سپورٹ اور سسٹم اپ گریڈز کی مد میں مستقل آمدنی میں بھی اضافہ ہوگا۔

ایوانسیون 26 مارچ 2003 کو پاکستان میں نجی لمیٹڈ کمپنی کے طور پر قائم ہوئی اور 31 مارچ 2008 کو پبلک کمپنی میں تبدیل ہوگئی۔ کمپنی کا بنیادی کاروبار آٹومیشن اور کنٹرول آلات کی تجارت اور متعلقہ تکنیکی خدمات فراہم کرنا ہے۔