بینک اسلامی پاکستان نے چیئرمین اور سی ای او مقرر کردیے

ملک کے معروف اسلامی مالیاتی ادارے بینک اسلامی پاکستان لمیٹڈ نے شاہد حسین جتوئی کو تین سالہ مدت کے لیے اپنے بورڈ آف ڈائریکٹرز کا چیئرمین مقرر کردیا ہے، جس کا اطلاق 10 اگست 2026 سے ہوگا۔

بینک نے اس پیش رفت سے متعلق پاکستان اسٹاک ایکسچینج (پی ایس ایکس) کو جاری کردہ نوٹس میں آگاہ کیا ہے۔

نوٹس کے مطابق بینک کے نو منتخب بورڈ آف ڈائریکٹرز نے 10 اگست 2026 کو ہونے والے اپنے پہلے اجلاس میں شاہد حسین جتوئی کو 10 اگست 2026 سے تین سال کی مدت کے لیے بورڈ کا چیئرمین مقرر کیا ہے۔

دریں اثنا، بورڈ نے فیصلہ کیا ہے کہ رضوان عطا 28 ستمبر 2026 کو اپنی موجودہ تین سالہ مدت مکمل ہونے تک بینک کے صدر اور چیف ایگزیکٹو آفیسر (سی ای او) کی حیثیت سے فرائض انجام دیتے رہیں گے۔

بینک اسلامی نے ایک علیحدہ نوٹس میں کہا ہے کہ بورڈ نے رضوان عطا کی کاوشوں کو سراہا اور ان کی خدمات کا اعتراف کیا۔

بینک نے مزید اعلان کیا کہ اس وقت ڈپٹی سی ای او کے عہدے پر فائز عمران حلیم شیخ کو 29 ستمبر 2026 سے تین سالہ مدت کے لیے نیا صدر اور چیف ایگزیکٹو آفیسر مقرر کیا گیا ہے۔

بینک نے مزید کہا کہ عمران حلیم شیخ کی تقرری اسٹیٹ بینک آف پاکستان (ایس بی پی) سے ضروری ریگولیٹری منظوری سے مشروط ہے۔

بینک اسلامی پاکستان لمیٹڈ کو 2004 میں پاکستان میں پبلک لمیٹڈ کمپنی کے طور پر قائم کیا گیا تھا۔ اس کے بانیوں میں جہانگیر صدیقی اینڈ کمپنی لمیٹڈ اور رنداری خاندان شامل تھے۔

بعد ازاں 2005 میں دبئی بینک بھی بطور بانی شیئر ہولڈر بینک میں شامل ہوگیا۔

اسٹیٹ بینک آف پاکستان (ایس بی پی) نے 2003 کی اسلامی بینکاری پالیسی کے تحت 2005 میں بینک اسلامی کو ’شیڈولڈ اسلامی کمرشل بینک‘ کا لائسنس جاری کیا، جبکہ بینک نے باضابطہ طور پر 7 اپریل 2006 کو اپنی سرگرمیوں کا آغاز کیا۔