ڈالر کے مقابلے میں روپیہ مزید تگڑا

انٹربینک مارکیٹ میں جمعرات کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 277.72 روپے پر بند ہوا۔

یاد رہے کہ بدھ کو مقامی کرنسی 277.75 روپے پر بند ہوئی تھی۔

مزید برآں جمعرات کو کرنسی مارکیٹ میں ملا جلا رجحان رہا جبکہ ین کے لیے مداخلت کے نتیجے میں حاصل ہونے والی بہتری برقرار رکھنا مشکل ہوگیا اور ڈالر چھ ہفتے کی کم ترین سطح کے قریب رہا۔ مجوزہ امریکا ایران معاہدے سے متعلق خدشات اور آئندہ امریکی روزگار کے اعداد و شمار کے باعث سرمایہ کار محتاط رہے۔

یورو کی قدر میں معمولی تبدیلی ہوئی اور یہ 1.1557 ڈالر پر رہا جبکہ پاؤنڈ بھی معمولی تبدیلی کے ساتھ 1.3469 ڈالر پر ٹریڈ ہوا۔ نیوزی لینڈ اور آسٹریلوی ڈالر بھی تقریباً مستحکم رہے اور بالترتیب 0.5885 ڈالر اور 0.7056 ڈالر پر ٹریڈ ہوتے رہے۔

ڈالر انڈیکس معمولی تبدیلی کے ساتھ 99.65 پر رہا اور سمت کے تعین میں مشکلات کا شکار رہا جبکہ یہ چھ ہفتے کی کم ترین سطح کے قریب موجود تھا۔

دریں اثنا برینٹ خام تیل کے مستقبل کے سودوں کی قیمت 0755 جی ایم ٹی تک 48 سینٹ یا 0.60 فیصد اضافے سے 79.93 ڈالر فی بیرل ہوگئی۔ امریکی ویسٹ ٹیکساس انٹرمیڈیٹ کی قیمت بھی 29 سینٹ یا 0.39 فیصد بڑھ کر 75.51 ڈالر فی بیرل ہوگئی۔