مشرق وسطیٰ میں کشیدگی برقرار، سونے کی قیمتیں مستحکم

عالمی منڈی میں سونے کی قیمتیں منگل کو تقریباً مستحکم رہیں کیونکہ سرمایہ کار امریکا اور ایران کے درمیان ممکنہ مذاکرات سے متعلق متضاد بیانات پر نظر رکھے ہوئے ہیں، جبکہ امریکی لیبر مارکیٹ سے متعلق اہم اعداد و شمار کا بھی انتظار کیا جا رہا ہے، جو فیڈرل ریزرو کی آئندہ شرح سود کی سمت کے بارے میں اشارے فراہم کر سکتے ہیں۔

اسپاٹ گولڈ 4,055.39 ڈالر فی اونس پر تقریباً بغیر کسی تبدیلی کے برقرار رہا، جبکہ امریکی گولڈ فیوچرز 0.6 فیصد اضافے کے ساتھ 4,055.10 ڈالر فی اونس تک پہنچ گئے۔

امریکی صدر ڈونلڈ ٹرمپ نے کہا ہے کہ ایران کے ساتھ مذاکرات جاری ہیں اور تہران کے پاس جنگ کے خاتمے کے لیے معاہدہ کرنے کا آخری موقع ہے۔ تاہم ایران نے اس دعوے کو مسترد کرتے ہوئے کہا ہے کہ امریکا کے ساتھ نہ کوئی مذاکرات ہو رہے ہیں اور نہ ہی کسی ملاقات کی منصوبہ بندی کی گئی ہے۔

مشرق وسطیٰ میں جاری تنازع نے توانائی کی قیمتوں میں اضافہ اور مہنگائی کے خدشات کو تقویت دی ہے، جس کے باعث مرکزی بینک قیمتوں پر قابو پانے کے لیے شرح سود بڑھا سکتے ہیں۔ اگرچہ سونا روایتی طور پر مہنگائی سے بچاؤ کا ذریعہ سمجھا جاتا ہے، لیکن بلند شرح سود سونے کی کشش کو کم کر دیتی ہے کیونکہ اس پر کوئی منافع حاصل نہیں ہوتا۔

مارکیٹ میں اس وقت تقریباً 65 فیصد امکان ظاہر کیا جا رہا ہے کہ فیڈرل ریزرو ستمبر میں شرح سود میں اضافہ کرے گا۔ نیویارک فیڈ کے صدر جان ولیمز نے کہا کہ انہیں توقع ہے کہ مہنگائی کا دباؤ بتدریج کم ہوگا، تاہم اگر ایسا نہ ہوا تو مرکزی بینک شرح سود بڑھانے سے گریز نہیں کرے گا۔

اس ہفتے امریکی ملازمتوں سے متعلق کئی اہم رپورٹس جاری ہوں گی، جن میں جاب اوپننگز، اے ڈی پی ایمپلائمنٹ رپورٹ اور جمعہ کو نان فارم پے رولز شامل ہیں۔ دوسری جانب جنوبی کوریا کے مرکزی بینک نے اعلان کیا ہے کہ وہ اپنے ذخائر بڑھانے اور سپلائی کے ذرائع متنوع بنانے کے لیے مقامی پیداوار سے سونا خریدے گا۔

دیگر قیمتی دھاتوں میں چاندی 0.1 فیصد اضافے کے ساتھ 58.24 ڈالر فی اونس، پلاٹینم 0.4 فیصد بڑھ کر 1,633.88 ڈالر فی اونس ہوگیا، جبکہ پیلیڈیم 0.2 فیصد کمی کے ساتھ 1,262 ڈالر فی اونس پر آگیا۔