ملک خدا بخش پی پی ڈی اے کے نئے چیئرمین منتخب

پاکستان پیٹرولیم ڈیلرز ایسوسی ایشن (پی پی ڈی اے) کی ایگزیکٹو کمیٹی نے ملک خدا بخش کو 85 فیصد اکثریت سے نیا چیئرمین منتخب کرلیا۔

تفصیلات کے مطابق پاکستان پیٹرولیم ڈیلرز ایسوسی ایشن کی ایگزیکٹو کمیٹی کا اجلاس اتوار کو ہوا جس میں ایسوسی ایشن کی آئندہ قیادت سے متعلق اہم فیصلے کیے گئے۔

ایسوسی ایشن کے مطابق، پی پی ڈی اے کے طویل عرصے سے سربراہ عبدالسمیع خان جن کی عمر اب 94 برس سے زائد ہے، ایسوسی ایشن کے روزمرہ امور میں فعال نہیں رہے جس کے باعث ایگزیکٹو کمیٹی نے ملک بھر کے پیٹرولیم ڈیلرز کے بہترین مفاد میں نئے چیئرمین کے انتخاب کا فیصلہ کیا۔

یہ اجلاس نائب چیئرمین انور کمال کی زیر صدارت منعقد ہوا۔ اجلاس میں کراچی اور پاکستان کے دیگر حصوں سے کل 25 اراکین نے فزیکل اور آن لائن دونوں طریقوں سے شرکت کی۔ اراکین نے اکثریت کے ساتھ ملک خدا بخش کو پی پی ڈی اے کا نیا چیئرمین منتخب کیا۔

ایگزیکٹو کمیٹی نے ایسوسی ایشن کے لیے ان کی 50 سالہ مخلصانہ اور بے لوث خدمات کا اعتراف کیا اور ان کی دیرینہ وابستگی کو سراہتے ہوئے انہیں اس عہدے کے لیے سب سے موزوں شخص قرار دیا۔

ان کی شاندار قیادت اور گراں قدر خدمات کے اعتراف میں ایگزیکٹو کمیٹی نے متفقہ طور پر عبد السمیع خان کو پاکستان پیٹرولیم ڈیلرز ایسوسی ایشن کا چیف پیٹرن مقرر کرنے کی منظوری دی۔