کویتی کمپنی کی پاکستان کے توانائی شعبے میں توسیع پر نظریں
- وفاقی وزیرِ پٹرولیم علی پرویز ملک اور کوفپیک کے وائس پریزیڈنٹ آپریشنز طارق ابراہیم کی ملاقات
کویت پیٹرولیم کارپوریشن (کے پی سی) کے ذیلی ادارے کویت فارن پیٹرولیم ایکسپلوریشن کمپنی(کوفپیک) نے پاکستان کے اپ اسٹریم انرجی سیکٹ میں اپنی موجودگی اور سرمایہ کاری کو مزید وسعت دینے میں دلچسپی ظاہر کی ہے۔
منگل کو جاری ہونے والے ایک بیان کے مطابق یہ پیشرفت وفاقی وزیرِ پٹرولیم علی پرویز ملک اور کوفپیک کے وائس پریزیڈنٹ آپریشنز طارق ابراہیم کے درمیان ہونے والی ملاقات کے دوران سامنے آئی جس میں پاکستان کے پیٹرولیم شعبے میں تعاون اور سرمایہ کاری کے مواقع کو مزید وسعت دینے پر تبادلۂ خیال کیا گیا۔
علی پرویز ملک نے کویت کو پاکستان کا قریب ترین دوست قرار دیتے ہوئے ان دونوں ممالک کے درمیان توانائی شعبے میں 50 سال سے زیادہ پرانی شراکت داری پر روشنی ڈالی۔ انہوں نے اس دیرینہ تعلق کو مزید مضبوط بنانے کیلئے حکومت کے عزم کا اعادہ کیا۔
طارق ابراہیم نے سرمایہ کاری کے مواقع فراہم کرنے میں تعاون پر وفاقی وزیر کا شکریہ ادا کیا اور کہا کہ کوفپیک پاکستان کے اپ اسٹریم انرجی سیکٹر میں اپنی موجودگی کو وسعت دینے کے لیے زبردست صلاحیت دیکھتا ہے۔
وفاقی وزیرِ پیٹرولیم نے کوفپیک کو حکومت کی جانب سے مکمل تعاون کی یقین دہانی کرائی اور پیٹرولیم شعبے میں بین الاقوامی سرمایہ کاری کے لیے سازگار ماحول فراہم کرنے کے پاکستان کے عزم کا اعادہ کیا۔
کوفپیک پاکستان میں بالخصوص تیل و گیس کی تلاش اور پیداوار (ایکسپلوریشن اینڈ پروڈکشن) کے شعبے میں سرگرم کردار ادا کر رہی ہے۔
2023 میں کوفپیک نے دو اہم مفاہمتی یادداشتوں کے ذریعے پاکستان کے تلاش اور پیداوار کے شعبے میں اپنی موجودگی کو نمایاں طور پر وسعت دی۔ آئل اینڈ گیس ڈویلپمنٹ کمپنی لمیٹڈ (اوجی ڈی سی ایل) کے ساتھ ایک مفاہمتی یادداشت کے تحت اپ اسٹریم کاروباری مواقع کا مشترکہ جائزہ لینے کو باضابطہ شکل دی گئی۔
Comments