ورلڈ کپ فائنل کی آخری گیند اور ہاف ٹائم شو کے ملبوسات نیلام ہوں گے

نیویارک کے معروف نیلام گھر کرسٹیز نے منگل کو اعلان کیا ہے کہ فیفا ورلڈ کپ کی یادگار اشیا، جن میں فائنل میں استعمال ہونے والی گیند اور ہاف ٹائم شو میں فنکاروں کے پہنے گئے ملبوسات شامل ہیں، آن لائن نیلام کیے جائیں گے۔

ایک ہفتے پر مشتمل یہ آن لائن نیلامی 22 جولائی سے شروع ہوگی، جس سے حاصل ہونے والی رقم فیفا گلوبل سٹیزن ایجوکیشن فنڈ کے لیے مختص کی جائے گی۔ اس اقدام کا مقصد ورلڈ کپ کے دوران دنیا بھر کے بچوں کی تعلیم کے لیے 100 ملین ڈالر جمع کرنا ہے۔

نیلامی کی نمایاں اشیا میں کولمبیا کی پاپ گلوکارہ شکیرا کا ورلڈ کپ 2026 کے سرکاری گانے ”ڈائی ڈائی“ کی میوزک ویڈیو میں پہنا گیا پیلے رنگ کا کراپ ٹاپ اور ٹراؤزر بھی شامل ہے۔

اس کے علاوہ شکیرا ہاف ٹائم شو میں جو لباس پہنیں گی، وہ بھی نیلامی کے لیے پیش کیا جائے گا۔ ورلڈ کپ کی تاریخ میں پہلی بار فائنل کے وقفے میں 11 منٹ پر مشتمل موسیقی کا خصوصی پروگرام منعقد ہوگا، جس میں میڈونا، جسٹن بیبر اور بی ٹی ایس بھی پرفارم کریں گے۔

نیلامی میں کئی فٹ بال بھی شامل ہیں، جن میں 19 جولائی کو نیو جرسی کے میٹ لائف اسٹیڈیم میں کھیلے جانے والے فائنل میں استعمال ہونے والی گیند اور گزشتہ ماہ میکسیکو میں افتتاحی میچ کی گیند شامل ہے۔

مزید برآں، 2022 کے ورلڈ کپ میں ارجنٹینا کی جرسی، جس پر اسٹار فٹ بالر لیونل میسی کے دستخط موجود ہیں، بھی نیلامی کا حصہ ہوگی، جبکہ امریکا کی مردوں کی قومی ٹیم کے کھلاڑیوں کے دستخطوں سے مزین امریکی ٹیم کی جرسی بھی فروخت کے لیے پیش کی جائے گی۔