گوادر بندرگاہ پر بین الاقوامی بنکرنگ کے آپریشن کا آغاز

گوادر بندرگاہ نے بحری جہاز سے جہاز میں ایندھن کی منتقلی کا پہلا بین الاقوامی آپریشن کامیابی سے مکمل کر لیا ہے۔ یہ پیش رفت گہرے سمندر کی اس بندرگاہ کو علاقائی میرین فیول حب بنانے اور عالمی بحری تجارت میں پاکستان کا کردار بڑھانے کی طرف ایک اہم قدم ہے۔

نیشنل لاجسٹکس کارپوریشن (این ایل سی) نے عالمی توانائی کمپنی ویٹول کے تعاون سے یو اے ای (عرب امارات) کے ایل این جی بحری جہاز ای این یو جی یو کو 2500 میٹرک ٹن عالمی معیار کا کم سلفر والا فیول آئل فراہم کیا۔ اس آپریشن میں استعمال ہونے والا ایندھن پاکستان کی کمپنی سائینرجیکو پی کے لمیٹڈ نے مقامی طور پر اپنی ریفائنری میں تیار کیا، جو عالمی جہاز رانی کی ضروریات کے مطابق کم سلفر والا ایندھن بنانے کی ملکی صلاحیت کا ثبوت ہے۔ حکام کے مطابق یہ کامیابی گوادر میں بین الاقوامی تجارتی جہازوں کو ایندھن کی فراہمی کے ایک جامع نظام کی بنیاد رکھے گی۔

اس سروس کے آغاز سے خلیج فارس اور بحیرہ عرب سے گزرنے والے ہزاروں عالمی بحری جہازوں کو ایندھن بھرنے کے لیے دبئی یا دیگر مہنگی بندرگاہوں کے بجائے گوادر کا ایک سستا اور قریبی متبادل مل گیا ہے۔مقامی ریفائنریوں کے تیار کردہ ایندھن کی بین الاقوامی جہازوں کو فروخت سے نہ صرف ملکی صنعتی صلاحیت کو فروغ ملے گا بلکہ پاکستان کے لیے قیمتی زرمبادلہ کمانے کے نئے راستے بھی کھلیں گے۔

کاپی رائٹ بزنس ریکارڈر 2026