مئی میں کرنٹ اکاؤنٹ 459 ملین ڈالر سرپلس ریکارڈ

پاکستان کا کرنٹ اکاؤنٹ گزشتہ ماہ مئی میں ریکارڈ سرپلس رہا۔

اسٹیٹ بینک کی جانب سے بدھ کو جاری کردہ اعدادوشمار کے مطابق ملکی کرنٹ اکاؤنٹ مئی 2026 کے دوران 459 ملین ڈالر کے بڑے سرپلس میں رہا۔

یہ سرپلس اپریل 2026 میں ریکارڈ کیے گئے 276 ملین ڈالر کے خسارے اور مئی 2025 میں ریکارڈ کیے گئے 44 ملین ڈالر کے خسارے کے بعد سامنے آیا۔

یہ سرپلس مئی کے دوران ترسیلاتِ زر میں نمایاں اضافے اور برآمدات میں معمولی بہتری کے باعث حاصل ہوا۔

اسٹیٹ بینک کے مطابق مئی 2026 کے دوران ملکی مجموعی برآمدات (اشیا اور خدمات) کا حجم 3.21 بلین ڈالر رہا جو گزشتہ سال کے اسی مہینے کے 3.17 بلین ڈالر کے مقابلے میں 1 فیصد سے کچھ زیادہ ہے۔

دریں اثنا مئی 2026 میں مجموعی درآمدات 6.49 بلین ڈالر رہیں جو گزشتہ سال کے اسی مہینے کے 6.39 بلین ڈالر کے مقابلے میں سالانہ بنیادوں پر تقریباً 2 فیصد زیادہ ہیں۔

مئی 2026 کے دوران ترسیلاتِ زر 4.25 ارب ڈالر رہیں جبکہ گزشتہ سال کی اسی مدت میں یہ رقم 3.69 ارب ڈالر تھی، یوں سالانہ بنیاد پر ترسیلاتِ زر میں 15.4 فیصد اضافہ ریکارڈ کیا گیا۔

رواں مالی سال کے پہلے گیارہ ماہ کے دوران کرنٹ اکاؤنٹ 255 ملین ڈالر کے مجموعی سرپلس میں رہا جو گزشتہ مالی سال کے اسی عرصے میں ریکارڈ کیے گئے 1.62 ارب ڈالر کے سرپلس کے مقابلے میں 84 فیصد کم ہے۔

وزیرِ خزانہ کے مشیر خرم شہزاد نے کہا ہے کہ یہ سرپلس پاکستان کی بیرونی مالی پوزیشن میں مسلسل بہتری کی عکاسی کرتا ہے۔

انہوں نے کہا کہ ”پانچ میں سے چار مہینوں میں سرپلس! مضبوط بیرونی کھاتہ پائیدار بلند اقتصادی ترقی کی بنیاد ہے۔“

پاکستان کے زرمبادلہ ذخائر (سی آر آر/ایس سی آر آر کو چھوڑ کر) بڑھ کر 17.27 ارب ڈالر تک پہنچ گئے جو گزشتہ سال کے 11.62 ارب ڈالر کے مقابلے میں 49 فیصد کا نمایاں سالانہ اضافہ ظاہر کرتے ہیں۔ یہ اضافہ اس بات کی نشاندہی کرتا ہے کہ کرنٹ اکاؤنٹ پر جاری ساختی دباؤ کے باوجود ملک کے بیرونی بفرز مضبوط ہوئے ہیں۔

ریئر انڈیکس

پاکستان کا رئیل ایفیکٹو ایکسچینج ریٹ (ریئر) اپریل 2026 میں 105.84 کے مقابلے میں مئی 2026 میں بڑھ کر 106.15 ہو گیا۔

100 سے زیادہ ریئر کا مطلب ہے کہ ملکی برآمدات غیر مسابقتی ہیں جب کہ درآمدات سستی ہیں۔ جب ریئر انڈیکس پر 100 سے نیچے ہوتا ہے تو صورتحال الٹ جاتی ہے۔

دریں اثنا نومنل ایفیکٹو ایکسچینج ریٹ (نیئر) انڈیکس میں مئی 2026 کے دوران ماہانہ 0.03 فیصد اضافہ ہوا جس کے بعد یہ اپریل 2026 کے 37.89 سے بڑھ کر 37.9 پر پہنچ گیا۔