ایران روانگی سے قبل محسن نقوی کی وزیراعظم شہباز شریف سے ملاقات

وفاقی وزیر داخلہ محسن نقوی نے ہفتے کے روز اپنے متوقع دورۂ تہران سے قبل وزیراعظم شہباز شریف سے ملاقات کی ہے۔ یہ بات وزیراعظم آفس (پی ایم او) نے ایک بیان میں بتائی ہے۔

ملاقات کے دوران محسن نقوی نے وزیراعظم کو کرغزستان کے دارالحکومت بشکیک میں شنگھائی تعاون تنظیم (ایس سی او) کے اجلاس کے موقع پر ہونے والی اپنی ملاقاتوں سے آگاہ کیا۔

وزیراعظم آفس کے مطابق ”ملاقات میں وزیر داخلہ کے آئندہ دورۂ تہران کے حوالے سے بھی مشاورت کی گئی۔ وزیراعظم نے اس دورے سے متعلق ضروری رہنمائی فراہم کی۔“

محسن نقوی کا دورۂ تہران اس لیے بھی اہمیت کا حامل ہے کہ پاکستان امریکا اور ایران کے درمیان تین ماہ سے زائد عرصے سے جاری تنازع کے خاتمے کے لیے ثالثی کی کوششیں جاری رکھے ہوئے ہے۔

دریں اثنا وزیراعظم اور وزیر داخلہ کے درمیان ملک میں امن و امان اور مجموعی سکیورٹی صورتحال پر بھی تفصیلی تبادلہ خیال ہوا۔

محسن نقوی نے وزیراعظم کو ملک بھر میں امن و امان برقرار رکھنے اور شہریوں کے تحفظ کو یقینی بنانے کے لیے کیے جانے والے اقدامات سے آگاہ کیا۔

وزیراعظم آفس کے مطابق وزیراعظم شہباز شریف نے امن و امان مزید بہتر بنانے اور ملک بھر میں سکیورٹی کو مؤثر بنانے کے لیے تمام متعلقہ اداروں کے درمیان قریبی رابطے اور مشترکہ حکمت عملی کی ضرورت پر زور دیا۔