فون کال میں نیتن یاہو کو "پاگل" کہا تھا، ٹرمپ کا اعتراف

امریکی صدر ڈونلڈ ٹرمپ نے اعتراف کیا ہے کہ انہوں نے لبنان میں جاری لڑائی کے حوالے سے ایک تلخ اور سخت جملوں سے بھرپور فون کال میں اسرائیلی وزیرِاعظم بنجمن نیتن یاہو کو ”پاگل“ کہا تھا، جبکہ امریکا ایران کے ساتھ کشیدگی ختم کرنے کے لیے مذاکرات کی کوشش کر رہا تھا۔

بدھ کے روز نشر ہونے والے ایک انٹرویو میں ٹرمپ سے پوچھا گیا کہ کیا انہوں نے اسرائیلی رہنما کو ”انتہائی نامعقول“ کہا تھا اور ان پر ناشکری کا الزام عائد کیا تھا، جیسا کہ خبر رساں ادارے ایکسیوس کی رپورٹ میں دعویٰ کیا گیا ہے۔

ٹرمپ نے ”پوڈ فورس ون“ پوڈکاسٹ میں کہا، ”میں نے کہا تھا۔ میں یہ نہیں کہوں گا کہ میں غصے میں تھا، لیکن میں تھوڑا پریشان ضرور تھا کہ وہ مسلسل لبنان کے ساتھ لڑائی میں الجھے ہوئے ہیں۔“

ٹرمپ نے مزید کہا کہ ان کے اور نیتن یاہو کے تعلقات مجموعی طور پر اچھے ہیں۔

ایکسیوس کی رپورٹ کے مطابق، جس میں ایک نامعلوم امریکی اہلکار کا حوالہ دیا گیا، ٹرمپ نے پیر کے روز ہونے والی فون کال میں نیتن یاہو سے کہا: ”تم پاگل ہو۔ اگر میں نہ ہوتا تو تم جیل میں ہوتے۔ میں تمہیں بچا رہا ہوں۔ اس سب کی وجہ سے اب سب تم سے اور اسرائیل سے نفرت کر رہے ہیں۔“

ٹرمپ نے انٹرویو میں کہا: ”کسی مرحلے پر میں نے کہا، بی بی، ہمیں یہ سب روکنا ہوگا۔ ہمیں اسے بند کرنا ہوگا۔“

ایران نے کہا ہے کہ وہ امریکا کے ساتھ کسی ایسے معاہدے پر رضامند نہیں ہوگا جس سے جنگ کا خاتمہ ہو، جب تک اس میں لبنان میں جنگ بندی بھی شامل نہ ہو۔ ایران کے مطابق اسرائیل نے مارچ میں لبنان پر اس مقصد سے حملہ کیا تھا کہ وہ حزب اللہ کے خلاف کارروائی کرے، جس نے تہران کی حمایت میں سرحد پار فائرنگ کی تھی۔

میدانِ جنگ میں کشیدگی اس کے باوجود جاری رہی ہے کہ پیر کے روز امریکا کی ثالثی میں ایک معاہدہ طے پایا تھا، جس کے تحت اسرائیل نے بیروت کے جنوبی مضافات، جو حزب اللہ کے زیرِ اثر ہیں، پر حملے روک دیے تھے، جبکہ حزب اللہ نے بھی سرحد پار حملے بند کر دیے تھے۔

لبنانی سکیورٹی ذرائع کے مطابق بدھ کے روز جنوبی لبنان میں اسرائیلی ڈرون حملوں میں کم از کم چھ افراد ہلاک ہوئے، جبکہ بیروت کے جنوب میں ایک گاڑی کو بھی نشانہ بنایا گیا۔ دوسری جانب اسرائیل نے کہا کہ اس نے ایک دشمن طیارے کو روک لیا ہے، جس کے بارے میں خیال ہے کہ وہ حزب اللہ کی جانب سے فائر کی گئی تھی۔

ٹرمپ نے اس سوال پر سخت ردعمل ظاہر کیا کہ آیا نیتن یاہو نے انہیں ایران پر حملے کے لیے “چکمہ” دیا تھا، اور کہا کہ ان کے ناقدین ”دشمن“ ہیں۔

ٹرمپ ماضی میں بھی اسرائیل کے حوالے سے سخت زبان استعمال کر چکے ہیں، جن میں گزشتہ سال ان کا وہ بیان بھی شامل ہے جس میں انہوں نے کہا تھا کہ اسرائیل اور ایران کو ”پتہ نہیں وہ کیا کر رہے ہیں“۔