بلوچستان میں تجارت کا فروغ: لسبیلہ چیمبر میں ٹڈاپ ہیلپ ڈیسک قائم کیا جائیگا

جنوبی بلوچستان میں تجارت کو فروغ دینے کے لئے ایک اہم اقدام کے تحت سیکرٹری ٹڈاپ نے ٹڈاپ اور پی ایچ ڈی ای سی کے اعلیٰ حکام کے ہمراہ لسبیلہ چیمبرکا دورہ کیا تاکہ وہاں باضابطہ طور پر ایک مخصوص ٹڈاپ اور پی ایچ ڈی ای سی ہیلپ ڈیسک قائم کیا جاسکے۔

لسبیلہ چیمبر کے صدر اور حب سالٹ کے سی ای او اسماعیل ستار نے وفد کا استقبال کیا جبکہ اس موقع پر ڈپٹی کمشنر حب جمعہ داد بھی ان کے ہمراہ تھے۔ ملاقات کے دوران وفد نے لسبیلہ انڈسٹریل زون اور ماربل سٹی میں رجسٹرڈ تقریباً 300 مقامی کمپنیوں سمیت جنوبی بلوچستان کے زرعی اورہارٹی کلچر کے برآمد کنندگان کو اسٹریٹجک مدد فراہم کرنے کے حوالے سے تبادلہ خیال کیا۔

ملاقات سے قبل حکام نے حب سالٹ انڈسٹری کا دورہ بھی کیا جہاں اسماعیل ستار نے بلوچستان کی معیشت کے حوالے سے اہم ترین معلومات اور بالخصوص معدنیات (منرلز) کے شعبے میں تجارت کے وسیع امکانات پر روشنی ڈالی۔

خطے کے انڈسٹریل فٹ پرنٹ پر روشنی ڈالتے ہوئے اسماعیل ستار نے بتایا کہ اکیلا حب قومی ٹیکس وصولی میں 480 ارب روپے کا بڑا حصہ ڈالتا ہے۔ دونوں فریقین نے مشترکہ ایکشن پلان تیار کرنے پر اتفاق کیا جسے پبلک پرائیویٹ پارٹنرشپ کے تحت مشترکہ طور پر نافذ کیا جائے گا جو بلوچستان کی وسیع برآمدی اور اقتصادی صلاحیتوں کو بروئے کار لانے کی سمت میں ایک بڑا اور اہم قدم ہے۔

کاپی رائٹ بزنس ریکارڈر 2026