پاک سوزوکی نے کراچی میں بائیو گیس پلانٹ اور سولر پاور سسٹم قائم کر دیا

پاک سوزوکی موٹر کمپنی لمیٹڈ، جو پاکستان میں سوزوکی موٹر کارپوریشن کی ذیلی کمپنی ہے، نے اپنے مینوفیکچرنگ پلانٹ میں 100 کیوبک میٹر یومیہ صلاحیت کا بائیو گیس پلانٹ اور 920 کلو واٹ آؤٹ پٹ صلاحیت کا سولر پاور جنریشن سسٹم متعارف کرایا ہے، اور دونوں سہولیات نے باقاعدہ طور پر کام شروع کر دیا ہے۔

ایک بیان کے مطابق، بائیو گیس پلانٹ اور سولر پاور جنریشن کی یہ سہولیات پاک سوزوکی کی کاربن نیوٹرلیٹی کی جانب اقدامات کا حصہ ہیں۔

پاک سوزوکی نے بتایا کہ بائیو گیس پلانٹ میں پاکستان میں عام طور پر دستیاب نیپئیر گھاس کے ساتھ ساتھ کمپنی کی کینٹین سے پیدا ہونے والے کچرے کو بھی استعمال کیا جا رہا ہے۔

کمپنی نے کہا کہ وہ ہر خطے، بشمول پاکستان، کی مخصوص صورتحال کے مطابق ماحولیاتی اقدامات کو فروغ دے کر ایک پائیدار معاشرے کے قیام میں اپنا کردار جاری رکھے گی۔

پاک سوزوکی موٹر کمپنی لمیٹڈ کے منیجنگ ڈائریکٹر ہیروشی کاوامورا نے کہا کہ ہمارے بائیو گیس پلانٹ اور سولر پاور سہولت کا آغاز اس بات کا مظہر ہے کہ ہم اپنے آپریشنز میں صاف توانائی کو شامل کرنے اور پاکستان کی ماحولیاتی ترجیحات میں بامعنی کردار ادا کرنے کے لیے پرعزم ہیں۔

انہوں نے مزید کہا کہ ہم ماحول دوست مینوفیکچرنگ طریقوں کو اپنانے کے لیے پرعزم ہیں اور ایسی ٹیکنالوجیز میں سرمایہ کاری جاری رکھیں گے جو ایک سرسبز مستقبل کی حمایت کریں۔

پاک سوزوکی کے کراچی میں واقع پلانٹ میں قائم یہ بائیو گیس پلانٹ 360 مربع میٹر کے رقبے پر محیط ہے اور اس کی پیداواری صلاحیت 100 کیوبک میٹر یومیہ ہے۔

دوسری جانب سولر پاور جنریشن سہولت بھی اسی پلانٹ میں واقع ہے، جس کی آؤٹ پٹ صلاحیت 920 کلو واٹ ہے اور یہ سالانہ 1,395,000 کلو واٹ آور بجلی پیدا کرے گی۔

پاکستان میں حالیہ برسوں کے دوران قابلِ تجدید توانائی میں نمایاں اضافہ دیکھا گیا ہے۔ ایک مطالعے کے مطابق، ملک نے گزشتہ پانچ سالوں میں تقریباً 18 ارب ڈالر کی لاگت سے 50 گیگا واٹ (جی ڈبلیو) سے زائد سولر پینلز درآمد کیے ہیں، جو حجم کے لحاظ سے ملک کے مکمل گرڈ کی صلاحیت کے برابر ہے۔