پاکستانی ٹیکنالوجی کمپنی کا آسٹریلیا میں آپریشنز بڑھانے کا فیصلہ، نیا ادارہ رجسٹر

پاکستانی ٹیکنالوجی کمپنی ایوانسیون لمیٹڈ (اے وی این) نے جمعرات کو اعلان کیا ہے کہ اس کی مکمل ملکیتی ذیلی کمپنی ایوانسیون ایف زیڈ ای نے آسٹریلیا میں ایوانسیون پی ٹی وائی لمیٹڈ کے نام سے ایک نئی کمپنی رجسٹر کرالی ہے۔

لسٹڈ کمپنی نے پاکستان اسٹاک ایکسچینج کو بھیجے گئے اپنے نوٹس میں اس پیش رفت سے آگاہ کیا ۔

ایوانسیون (اے وی این) نے بتایا کہ نئے ادارے کو آسٹریلین سیکیورٹیز اینڈ انوسٹمنٹ کمیشن کے تحت کارپوریشنز ایکٹ 2001 کے مطابق کوئینز لینڈ میں رجسٹرڈ کیا گیا ہے۔

ایشیا پیسیفک ریجن میں کمپنی کی موجودگی گروپ کے کاروبار پر مثبت اثرات مرتب کرنے اور شیئر ہولڈرز کی ویلیو کو زیادہ سے زیادہ بڑھانے کی راہ ہموار کرتی ہے۔

ایوانسیون پی ٹی وائی لمیٹڈ کے ذریعے کمپنی کا مقصد آٹومیشن، ڈیجیٹلائزیشن اور انڈسٹریل ٹیکنالوجی میں اپنے عالمی تجربے اور ثابت شدہ مہارت کو بروئے کار لاتے ہوئے متعدد شعبوں میں صارفین کو معاونت فراہم کرنا ہے۔

نیا ادارہ آئی ٹی اور تکنیکی خدمات، تیل و گیس، ٹرانسپورٹ اور انفرااسٹرکچر، تعمیرات، مینوفیکچرنگ، مائننگ اور ماحولیاتی خدمات کے شعبوں میں جدید حل فراہم کرنے پر توجہ مرکوز کرے گا۔

ایوانسیون (اے وی این) 26 مارچ 2003 کو بطور پرائیویٹ لمیٹڈ کمپنی پاکستان میں قائم کی گئی تھی جسے بعد ازاں منسوخ شدہ کمپنیز آرڈیننس 1984 کے تحت 31 مارچ 2008 کو پبلک کمپنی میں تبدیل کر دیا گیا۔