بجلی کے بلوں پر سبسڈی کی رقم واضح طور پر درج کرنے کا فیصلہ

وزارت توانائی نے بجلی کی تقسیم کار کمپنیوں کو ہدایت کی ہے کہ وہ اہل صارفین کے ماہانہ بجلی کے بلوں میں فراہم کردہ سبسڈی کی رقم واضح طور پر درج کریں۔

جمعرات کو جاری کردہ ایک بیان میں بجلی کی تقسیم کار کمپنیوں نے حکومتی سبسڈی کے حوالے سے صارفین کی سہولت کے لیے ایک اہم قدم اٹھایا ہے۔

ترجمان نے کہا کہ ایسے صارفین جنہیں حکومت کی جانب سے سبسڈی دی جا رہی ہے، ان کے ماہانہ بلوں میں اب واضح طور پر یہ درج ہوگا کہ اس ماہ انہیں کتنی سبسڈی فراہم کی گئی ہے۔

وزارتِ توانائی کے مطابق یہ قدم اس لیے اٹھایا گیا ہے تاکہ یہ سبسڈیز اصل حقدار صارفین تک پہنچ سکیں۔

وزارت نے آگاہ کیا کہ بجلی کے بل پر ایک کیو آر کوڈ پرنٹ کیا جا رہا ہے جسے صارفین کو اسکین کرکے اپنی رجسٹریشن کروانی ہوگی۔ اس رجسٹریشن کا مقصد صرف غریب اور بجلی کا کم استعمال کرنے والے صارفین کے لیے ریلیف کو یقینی بنانا ہے۔

مزید کہا گیا کہ واضح رہے کہ اس کا مطلب کسی بھی صورت میں سبسڈی ختم کرنا نہیں ہے۔

وزارت نے اس بات پر زور دیا کہ غریب اور متوسط طبقے کو ریلیف کی فراہمی حکومت کی اولین ترجیح ہے اور اس عمل کا مقصد محض وسائل کے درست اور منصفانہ استعمال کو یقینی بنانا ہے۔

عوام سے گزارش کی جاتی ہے کہ سبسڈی کے تسلسل کو برقرار رکھنے کے لیے فراہم کردہ کیو آر کوڈ پر جلد از جلد رجسٹریشن کروائیں۔

مزید بتایا گیا کہ بل میں کسی غلطی یا دیگر مسائل کی صورت میں، صارفین اپنی متعلقہ بجلی کمپنی کے ہیلپ لائن نمبر پر رابطہ کر سکتے ہیں۔

حکومت عوام کی سہولت اور شفافیت کے لیے پرعزم ہے اور کسی بھی سیاسی یا معاشی دباؤ کے باوجود غریبوں کے حقوق کی ادائیگی جاری رکھے گی۔