وافر چینی کی برآمد سے تجارتی خسارے میں کمی آئے گی، لاہور چیمبر

لاہور چیمبر آف کامرس کے صدر فہیم الرحمن سہگل نے کہا ہے کہ اضافی چینی کی برآمد سے پاکستان کے تجارتی خسارے میں کمی واقع ہو گی، چیمبر میں انہوں نے کہا یہ فوڈ سیکورٹی کا مسئلہ ہے ۔

پاکستان شوگر ملز ایسوسی ایشن کی جانب سے جاری کردہ پریس ریلیز کے مطابق انہوں نے شوگر انڈسٹری کے موقف کی تائید کرتے ہوئے کہا کہ مقامی چینی کی ضروریات پوری ہونے کے بعد سرپلس چینی کو برآمد کر دینا چاہیے۔

انہوں نے کہا کہ خلیجی ممالک کی موجودہ صورتحال کے پیشِ نظر پاکستان کو اپنی برآمدات میں اضافہ کرنا چاہیے۔ وہاں اشیائے خورونوش کی بہت زیادہ طلب ہے کیونکہ وہ ممالک اپنی غذائی ضروریات درآمدات کے ذریعے پوری کرتے ہیں۔

فہیم الرحمن سہگل نے کہا کہ حکومت کو اس امر کی ترجیح دینی چاہیے کہ ملکی ضروریات سے زائد چینی کو برآمد کر کے پاکستان کیلئے بیش قیمت غیر ملکی زرِمبادلہ حاصل کیا جائے۔

انہوں نے مزید کہا کہ ملک میں گنے کی بمپر فصل کی پیداوار ہوئی ہے اور اس حوالے سے چینی کو زیادہ دیر تک اسٹاک نہیں کیا جا سکتا۔ اس کے علاوہ پاکستان کا تجارتی خسارہ بھی بہت زیادہ بڑھ چکا ہے۔

اعداد و شمار کے مطابق پاکستان کی برآمدات 8 فیصد تک کم ہو گئی ہیں جبکہ درآمدات 6.5 فیصد بڑھ چکی ہیں تو اس تجارتی خسارہ کو کم کرنے کیلئے اگر چینی برآمد ہوتی ہے تو مقامی ضروریات پوری کرنے کے بعد سرپلس چینی کو ضرور برآمد کیا جانا چاہئے۔