حکومت نے پٹرول کی قیمت میں 6.51 روپے اور ڈیزل میں 19.39 روپے فی لیٹر اضافہ کر دیا

حکومت نے جمعرات کو پیٹرولیم مصنوعات کی قیمتوں میں اضافہ کر دیا، جس کے تحت پٹرول کی قیمت میں 6.51 روپے فی لیٹر اور ہائی اسپیڈ ڈیزل کی قیمت میں 19.39 روپے فی لیٹر اضافہ کیا گیا ہے۔

وزارتِ توانائی (پیٹرولیم ڈویژن) کی جانب سے جاری نوٹیفکیشن کے مطابق موٹر اسپرٹ (پٹرول) کی نئی قیمت 393.35 روپے سے بڑھا کر 399.86 روپے فی لیٹر مقرر کی گئی ہے۔

اسی طرح ہائی اسپیڈ ڈیزل کی قیمت 380.19 روپے سے بڑھا کر 399.58 روپے فی لیٹر کر دی گئی ہے۔

نظرثانی شدہ قیمتیں یکم مئی سے ملک بھر میں نافذ العمل ہوں گی۔

یہ اقدام اس وقت سامنے آیا جب وزارتِ پیٹرولیم نے ان سوشل میڈیا رپورٹس کو مسترد کر دیا جن میں دعویٰ کیا گیا تھا کہ یکم مئی سے ملک بھر میں پیٹرول پمپس بند ہو جائیں گے۔ وزارت نے ان خبروں کو بے بنیاد اور گمراہ کن قرار دیا۔

پیٹرولیم ڈویژن کے مطابق ملک میں پیٹرولیم مصنوعات کی فراہمی بدستور بلا تعطل جاری ہے اور فی الحال کسی بھی پیٹرول پمپ کی بندش کا کوئی منصوبہ موجود نہیں۔

بیان میں عوام سے اپیل کی گئی کہ غیر مصدقہ اطلاعات کی بنیاد پر خوف و ہراس نہ پھیلائیں، کیونکہ ایسی منفی پروپیگنڈا شہریوں میں غیر ضروری بے چینی پیدا کرتا ہے۔

ڈویژن نے مزید کہا کہ مشرقِ وسطیٰ میں کشیدگی کے آغاز کے باوجود ملک میں ایندھن کی سپلائی مسلسل جاری اور مستحکم رہی ہے۔

وزارت نے یہ بھی واضح کیا کہ حکومت مستقبل میں بھی پیٹرولیم مصنوعات کی مسلسل اور بلا تعطل فراہمی کو یقینی بنانے کے لیے تمام ضروری اقدامات کر رہی ہے۔