آبنائے ہرمز کی بندش پر پاکستان کا اظہارِ تشویش

اقوامِ متحدہ میں پاکستان کے مستقل مندوب عاصم افتخار احمد نے منگل کو کہا کہ پاکستان آبنائے ہرمز کی بندش پر فکر مند ہے کیونکہ وہ اس سے براہِ راست متاثر ہوتا ہے۔

یہ خدشات اقوامِ متحدہ کی سلامتی کونسل میں بحری حدود میں آبی گزرگاہوں کی حفاظت اور تحفظ کے موضوع پر منعقدہ اعلیٰ سطح کے کھلے مباحثے کے دوران پاکستان کی جانب سے ظاہر کیے گئے۔

عاصم افتخار احمد نے کہا کہ اگر یہ بحران برقرار رہا تو تیل و گیس اور کھاد جیسی ضروری اشیاء کی خریداری اور ان کی قیمتوں کے رجحانات سے متعلق پڑنے والے ابتدائی اثرات، بتدریج مہنگائی، شرح نمو، کرنٹ اکاؤنٹ اور ادائیگیوں کے توازن جیسے دوسرے اور تیسرے درجے کے سنگین اثرات میں بدل جائیں گے۔

انہوں نے کہا کہ ترقی پذیر ممالک اس سے سب سے زیادہ متاثر ہوں گے۔

عاصم افتخار نے چین، سعودی عرب، ترکیہ اور مصر سمیت برادر ممالک کے تعاون سے کشیدگی میں کمی اور امریکہ اور ایران کے درمیان استحکام کے وسیع تر حصول کے لیے تعمیری سفارتی کوششوں کی قیادت کی ہے۔

انہوں نے کہا کہ پاکستان سفارت کاری اور مذاکرات پر اپنے پختہ یقین پر قائم ہے اور اس مقصد کے لیے ہر ممکن اقدامات عزم کے ساتھ جاری رکھے گا۔

انہوں نے خلیجی خطے کے تمام برادر ممالک کے ساتھ پاکستان کی مکمل حمایت اور یکجہتی کا اظہار بھی کیا اور ان کی خودمختاری، علاقائی سالمیت اور سیاسی آزادی کی حمایت کا اعادہ کیا۔

پاکستانی مندوب نے کہا کہ عالمی بحری حدود عالمی تجارت کی شہ رگ، زمین کے ماحول کی آئینہ دار اور سمندری حیات و معدنی وسائل کا ایک وسیع ذخیرہ ہیں۔

عاصم افتخار نے کہا کہ سمندری ٹریفک میں کسی بھی قسم کا تعطل بین الاقوامی تجارت کو بری طرح متاثر کرتا ہے جس کے عالمی معیشت پر منفی اثرات مرتب ہوتے ہیں اور اس سے ایسی غیر یقینی صورتحال جنم لیتی ہے جو بین الاقوامی امن و سلامتی کو خطرے میں ڈال دیتی ہے۔

انہوں نے موقف اختیار کیا کہ آبنائے ہرمز کی بندش اور اس کے نتیجے میں غذائی و توانائی کی حفاظت اور سپلائی چین میں پیدا ہونے والی رکاوٹیں اس کی ایک واضح مثال ہیں۔