مرکزی بینکوں کے اہم ہفتے کا آغاز، جاپانی ین مستحکم

جاپانی ین منگل کے روز ایشیائی منڈی میں مستحکم رہا، کیونکہ سرمایہ کار بینک آف جاپان کے آئندہ مانیٹری پالیسی فیصلے کے منتظر تھے۔ یہ ہفتہ عالمی سطح پر مرکزی بینکوں کے اہم فیصلوں سے بھرپور ہے، جن میں امریکی فیڈرل ریزرو بھی شامل ہے، جبکہ امریکہ اور ایران کے درمیان جنگی کشیدگی بھی منڈیوں پر اثر انداز ہو رہی ہے۔

ڈالر کے مقابلے میں جاپانی ین 159.49 کی سطح پر بغیر کسی تبدیلی کے رہا۔ توقع ہے کہ بینک آف جاپان شرح سود کو 0.75 فیصد پر برقرار رکھے گا۔ اسی ہفتے امریکی فیڈرل ریزرو، یورپی مرکزی بینک، بینک آف انگلینڈ اور بینک آف کینیڈا بھی شرح سود کے فیصلے کریں گے۔

نیشنل آسٹریلیا بینک کے ماہر رے ایٹریل کے مطابق عالمی غیر یقینی صورتحال اور مشرق وسطیٰ کی جنگ نے پالیسی سازوں کو محتاط رویہ اپنانے پر مجبور کر دیا ہے، جس کے باعث شرح سود میں فوری تبدیلی کے امکانات کم ہو گئے ہیں۔

جاپان کے وزیر خزانہ سَتسوکی کاتایاما نے بھی کرنسی مارکیٹ میں اتار چڑھاؤ پر تشویش ظاہر کرتے ہوئے کہا کہ خام تیل کی قیمتوں میں تبدیلی کرنسی مارکیٹ کو متاثر کر رہی ہے، اور حکام ہر وقت صورتحال پر نظر رکھے ہوئے ہیں۔

امریکی فیڈرل اوپن مارکیٹ کمیٹی بدھ کے روز اجلاس کرے گی اور توقع ہے کہ شرح سود برقرار رکھی جائے گی۔ اس کے ساتھ ساتھ کیون وارش کی بطور فیڈ چیئر نامزدگی پر بھی پیش رفت متوقع ہے۔

کرنسی مارکیٹ میں امریکی ڈالر انڈیکس 0.1 فیصد اضافے کے ساتھ 98.448 پر پہنچ گیا۔ یورو 1.1715 ڈالر، برطانوی پاؤنڈ 1.3527 ڈالر، آسٹریلوی ڈالر 0.7187 اور نیوزی لینڈ ڈالر 0.5908 ڈالر پر مستحکم رہے۔

کرپٹو کرنسی مارکیٹ میں بٹ کوائن 0.5 فیصد اضافے کے ساتھ 77,365.65 ڈالر جبکہ ایتھریم 0.6 فیصد بڑھ کر 2,306.63 ڈالر پر پہنچ گیا۔