میزان بینک کا پہلی سہ ماہی میں 23.4 ارب روپے کا منافع

میزان بینک لمیٹڈ نے 31 مارچ 2026ء کو ختم ہونے والی سہ ماہی کے مالیاتی نتائج کا اعلان کردیا ۔

میزان بینک کو 31 مارچ 2026ء کو ختم ہونے والی سہ ماہی میں 23.4 ارب روپے کا بعد ازٹیکس منافع حاصل ہوا جو کہ پچھلے سال کے اسی عرصے کے مقابلے میں 6 فیصد زیادہ ہے۔

اس کے نتیجے میں سالانہ بنیاد پر ریٹرن آن ایکویٹی 34 فیصد رہی جو شیئر ہولڈرز کی ویلیو میں اضافے کے حوالے سے بینک کی حکمت عملی کی عکاسی ہے۔

بورڈ آف ڈائریکٹرز نے 2026 کی پہلی سہ ماہی میں حصص یافتگان کیلئے 75فیصد (7.5روپے فی شیئر) عبوری کیش ڈیوڈنڈ کی بھی منظوری دی ہے۔

اس بات کا اعلان میزان بینک کی بورڈ آف ڈائریکٹرز کی میٹنگ کے بعد کیا گیا جس کی صدارت بورڈ کے چیئرمین ریاض ایس اے اے ادریس نے کی۔

زیرِ جائزہ مدّت کے دوران بینک کے ریٹیل ڈپازٹس میں مضبوط اضافہ دیکھنے میں آیا جس کے باعث مجموعی ڈپازٹس 10 فیصد اضافے کے ساتھ 3.6ٹریلین روپے تک پہنچ گئے ہیں۔

اس طرح میزان بینک نے ڈپازٹس کے لحاظ سے ملک کے بڑے بینکوں میں اپنی پوزیشن مزید مستحکم کی۔

بینک کے مجموعی اثاثے سال کے آغاز سے مستحکم رہتے ہوئے 4.79 ٹریلین روپے کی سطح پر برقرار رہے۔

میزان بینک 365 شہروں میں 1,115 برانچز اور 1,350 سے زائد اے ٹی ایمز کے ساتھ ملک بھر میں مضبوط نیٹ ورک کا حامل بینک ہے۔

اس کے علاوہ، میزان بینک کی موبائل بینکنگ ایپلی کیشن پاکستان کے بینکاری شعبے میں گوگل پلے اسٹور اور ایپل ایپ اسٹور پر مسلسل اعلیٰ درجہ بندی حاصل کرنے والی ایپس میں شامل ہے۔

کاپی رائٹ بزنس ریکارڈر 2026