گوارڈیولا کا اشارہ، روڈری کی مانچسٹر سٹی میں جلد واپسی متوقع

پیپ گوارڈیولا نے مانچسٹر سٹی کے ان خدشات کو کم کر دیا ہے کہ روڈری پریمیئر لیگ کے بقیہ سیزن سے باہر ہو سکتے ہیں، تاہم ہسپانوی مڈفیلڈر بدھ کو برنلے کے خلاف ہونے والے میچ میں شرکت نہیں کر سکیں گے۔

2024 کے بیلن ڈی اورفاتح روڈری اتوار کو آرسنل کے خلاف اہم فتح میں کلیدی کردار ادا کرنے کے بعد انجری کا شکار ہو گئے تھے۔ 29 سالہ روڈری کی عدم موجودگی میں سٹی کی ٹیم کل برنلے کے خلاف جیت کر پہلی بار پوائنٹس ٹیبل پر ٹاپ پوزیشن حاصل کرنے کی کوشش کرے گی۔

گوارڈیولا کا کہنا تھا کہ روڈری کل کے میچ کے لیے دستیاب نہیں ہوں گے، تاہم ساؤتھ ہیمپٹن کے خلاف ایف اے کپ سیمی فائنل یا ایورٹن کے خلاف میچ میں ان کی واپسی ممکن ہے۔ روڈری اور برنارڈو سلوا کی مڈ فیلڈ جوڑی سٹی کی حالیہ فتوحات میں ریڑھ کی ہڈی ثابت ہوئی ہے۔

اگر سٹی کل کا میچ جیت کر برنلے کی تنزلی یقینی بنا دیتی ہے، تب بھی وہ آرسنل کے برابر ہوگی اور ٹائٹل کی جنگ آخری پانچ میچوں تک جاری رہے گی۔ گوارڈیولا نے خبردار کیا کہ آنے والا شیڈول انتہائی سخت ہے اور کسی بھی غلطی کی گنجائش نہیں۔