مضبوط ڈالر کے باعث سونے کی قیمتوں میں کمی

سونے کی عالمی قیمتوں میں منگل کے روز معمولی کمی دیکھنے میں آئی، جس کی بڑی وجہ امریکی ڈالر کی مضبوطی اور امریکہ و ایران کے درمیان ممکنہ امن مذاکرات سے متعلق غیر یقینی صورتحال ہے۔ سرمایہ کار اس بات کے منتظر ہیں کہ آیا دونوں ممالک اس ہفتے اسلام آباد میں مذاکرات کریں گے یا نہیں۔

اسپاٹ گولڈ کی قیمت 0.2 فیصد کمی کے بعد 4,807.91 ڈالر فی اونس ریکارڈ کی گئی، جبکہ امریکی گولڈ فیوچرز (جون ڈیلیوری) 4,827.30 ڈالر پر مستحکم رہے۔ پیر کے روز سونا 13 اپریل کے بعد اپنی کم ترین سطح پر آ گیا تھا۔

ڈالر کی قدر میں اضافے کے باعث دیگر کرنسیوں کے حامل خریداروں کے لیے کموڈیٹیز مزید مہنگی ہو گئی ہیں، جس نے سونے پر دباؤ بڑھایا۔

مارکیٹ ماہر کیل روڈا کے مطابق سرمایہ کار اس بات پر نظر رکھے ہوئے ہیں کہ آیا اسلام آباد میں مذاکرات آگے بڑھتے ہیں یا نہیں، اور اگر ایسا ہوا تو جنگ بندی میں توسیع یا مکمل امن معاہدہ ممکن ہو سکتا ہے۔ ان کے مطابق اگر معاہدہ ہوتا ہے تو تیل کی قیمتیں گر سکتی ہیں، جس سے سونا سپورٹ حاصل کر سکتا ہے، تاہم ناکامی کی صورت میں مارکیٹ میں دوبارہ اتار چڑھاؤ بڑھ سکتا ہے۔

ادھر تیل کی قیمتوں میں بھی کمی دیکھی گئی ہے کیونکہ سرمایہ کار سپلائی خطرات کو دوبارہ جانچ رہے ہیں۔ امریکہ اور ایران کے درمیان ممکنہ مذاکرات کی امیدوں کے باعث خطے سے تیل کی سپلائی بہتر ہونے کا امکان ظاہر کیا جا رہا ہے۔

ایران کے ایک سینئر عہدیدار کے مطابق تہران اسلام آباد میں امن مذاکرات میں شرکت پر غور کر رہا ہے، خاص طور پر اس صورتحال میں جب امریکہ کی جانب سے ایرانی بندرگاہوں پر پابندی کے بعد سفارتی کوششیں تیز ہو رہی ہیں۔ موجودہ جنگ بندی، جو دو ہفتے قبل شروع ہوئی تھی، اس ہفتے ختم ہونے جا رہی ہے۔

رپورٹس کے مطابق امریکی اور اسرائیلی حملوں کے بعد سے سونے کی قیمتوں میں مجموعی طور پر تقریباً 8 فیصد کمی ہو چکی ہے۔

دیگر دھاتوں میں چاندی 0.6 فیصد کمی کے ساتھ 79.40 ڈالر فی اونس، پلاٹینم 0.7 فیصد کمی سے 2,074 ڈالر جبکہ پیلیڈیم 0.3 فیصد اضافے کے ساتھ 1,556.16 ڈالر فی اونس پر پہنچ گیا۔