آئی ایم ایف چیف کرسٹالینا جارجیوا کی پاکستان کی معاشی اصلاحات میں پیش رفت کی تعریف

بین الاقوامی مالیاتی فنڈ (آئی ایم ایف) نے پاکستان کی معاشی اصلاحات میں مسلسل پیش رفت کو سراہا ہے۔

یہ بات آئی ایم ایف کی منیجنگ ڈائریکٹر کرسٹالینا جارجیوا نے وفاقی وزیر خزانہ و ریونیو محمد اورنگزیب سے واشنگٹن میں آئی ایم ایف اور ورلڈ بینک کے اسپرنگ اجلاس 2026 کے موقع پر ملاقات کے دوران کہی۔

کرسٹالینا جارجیوا نے کہا کہ پاکستان کے اصلاحاتی پروگرام کے مؤثر نفاذ نے میکرو اکنامک استحکام برقرار رکھنے اور سرمایہ کاروں کے اعتماد میں اضافے میں اہم کردار ادا کیا ہے۔

انہوں نے مزید کہا کہ پائیدار اقتصادی ترقی اور عوامی فلاح و بہبود کے لیے مضبوط معاشی پالیسیوں کے ساتھ ساتھ ساختی اصلاحات کا تسلسل بھی نہایت ضروری ہے۔

اسی دوران وزیر خزانہ محمد اورنگزیب نے واشنگٹن میں ورلڈ بینک و آئی ایم ایف اجلاس کے موقع پر بروکرز پلیٹ فارم کے اجرا میں بھی شرکت کی۔

وزارت خزانہ کے مطابق وزیر خزانہ نے اس موقع پر کہا کہ متعدد ترقی پذیر ممالک شدید قرضوں کے دباؤ کا شکار ہیں اور انہیں قرض کی بلند لاگت اور عالمی مالیاتی سختیوں کا سامنا ہے، جس سے ان کی ترقی اور پائیدار ترقی میں سرمایہ کاری کی صلاحیت متاثر ہو رہی ہے۔

انہوں نے کہا کہ اگرچہ ملکی سطح پر اصلاحات جاری ہیں، لیکن عالمی مالیاتی ڈھانچے میں موجود رکاوٹیں قرض لینے والے ممالک کی پالیسی گنجائش کو محدود کر رہی ہیں۔

انہوں نے مزید کہا کہ یہ پلیٹ فارم ایک اہم خلا کو پُر کرتا ہے کیونکہ اس سے قرض لینے والے ممالک کو تجربات کے تبادلے، نئے خطرات کی نشاندہی اور مشترکہ نقطہ نظر اپنانے کا موقع ملے گا۔

وزیر خزانہ نے واضح کیا کہ یہ پلیٹ فارم کوئی مذاکراتی اتحاد نہیں بلکہ ایک رضاکارانہ اور رکن ممالک کی قیادت میں چلنے والا فورم ہے جو تجربات کے تبادلے اور سیکھنے کے لیے قائم کیا گیا ہے۔

بعد ازاں محمد اورنگزیب نے اقوام متحدہ کے سیکرٹری جنرل انتونیو گوتریس سے بھی ملاقات کی۔

ملاقات میں مشرق وسطیٰ کی موجودہ صورتحال اور اس کے عالمی اثرات خصوصاً خوراک اور توانائی کی سلامتی پر اثرات پر گفتگو ہوئی۔

اقوام متحدہ کے سیکرٹری جنرل نے پاکستان کے امن و استحکام کے لیے کردار کو سراہا اور عالمی سطح پر اس کی تعمیری شمولیت پر اعتماد کا اظہار کیا۔