بھارت کی سات سال بعد ایرانی تیل کی خریداری، ادائیگیوں میں کوئی رکاوٹ نہیں

بھارتی وزارتِ پیٹرولیم نے ہفتے کو بتایا کہ مشرقِ وسطیٰ میں جاری تنازع، جس نے آبنائے ہرمز کے ذریعے سپلائی کو معطل کر دیا ہے کے دوران بھارتی ریفائنریز نے ایرانی تیل کی خریداری کی ہے۔

تیل کی دنیا کے تیسرے سب سے بڑے درآمد کنندہ اور صارف ملک بھارت نے مئی 2019 سے ایرانی خام تیل نہ خریدنے کے امریکی دباؤ کے بعد تہران سے کوئی کھیپ موصول نہیں کی تھی۔ تاہم امریکہ-اسرائیل جنگ کی وجہ سے سپلائی میں آنے والے تعطل نے اس جنوبی ایشیائی ملک کو شدید متاثر کیا ہے۔

وزارتِ پٹرولیم نے ایکس پر بتایا کہ مشرقِ وسطیٰ میں سپلائی کی معطلی کے دوران بھارتی ریفائنریز نے اپنی خام تیل کی ضروریات بشمول ایران سے پوری کر لی ہیں اور ایرانی خام تیل کی درآمدات کے لیے ادائیگیوں میں اب کوئی رکاوٹ (ادائیگی کا مسئلہ) موجود نہیں ہے۔

گزشتہ ماہ امریکہ نے سپلائی کی کمی کو دور کرنے کے لیے ایرانی تیل اور ریفائنڈ مصنوعات پر عائد پابندیاں عارضی طور پر ہٹا دی تھیں۔

وزارت نے مزید کہا کہ بھارت نے آنے والے مہینوں کے لیے خام تیل کی اپنی تمام تر ضروریات کو محفوظ کر لیا ہے۔

بھارت 40 سے زائد ممالک سے خام تیل درآمد کرتا ہے اور بھارتی کمپنیوں کو تجارتی مفادات کی بنیاد پر مختلف ذرائع اور جغرافیائی خطوں سے تیل حاصل کرنے کی مکمل آزادی اور لچک حاصل ہے۔

بھارت نے ایک ایسی پابندی زدہ بحری جہاز کے ذریعے 44,000 میٹرک ٹن ایرانی ایل پی جی بھی خریدی ہے جس پر پابندیاں عائد تھیں۔ وزارت کے مطابق، یہ جہاز بدھ کو مغربی بندرگاہ منگلور پر لنگر انداز ہوا، جہاں اب ایندھن اتارنے کا عمل جاری ہے۔