ایران میں امریکی لڑاکا طیارہ مارگرایا گیا،عملے کی تلاش جاری، امریکی اہلکار

ایران کی فضاؤں میں ایک امریکی لڑاکا طیارہ مار گرایا گیا جبکہ بچ جانے والے عملے کی تلاش کے لیے ریسکیو آپریشن جاری ہے۔ یہ بات ایک امریکی عہدے دار نے جمعہ کو رائٹرز کو بتائی۔

پینٹاگون اور امریکی سینٹرل کمانڈ نے اس معاملے پر تبصرے کی درخواستوں کا کوئی جواب نہیں دیا۔

جاری تنازع کے دوران امریکی پائلٹ کے ایران میں زندہ بچنے اور فرار ہونے کے امکانات نے امریکہ کے لیے اس جنگ میں خطرات اور ذمہ داریوں کو نمایاں طور پر بڑھا دیا ہے۔

ایران کے اندر امریکی پائلٹس کے زندہ ہونے اور روپوش ہونے کے امکان نے امریکہ کے لیے اس تنازع میں مشکلات مزید بڑھا دی ہے جو رائے عامہ کے جائزوں کے مطابق پہلے ہی امریکی عوام میں خاطر خواہ حمایت حاصل کرنے میں مشکلات کا شکار ہے۔

یہ امریکی فوج کے لیے بھی ایک بڑا چیلنج ہے، جسے اب دوہرے مقاصد کا سامنا ہے: ایک طرف زندہ بچ جانے والے امریکی عملے کی جان بچانے کی کوشش کرنا اور دوسری طرف ان خطرناک ریسکیو مشنز میں شامل اہلکاروں کی حفاظت کو یقینی بنانا۔

ایرانی حکام نے شہریوں کو ہدایت کی ہے کہ وہ طیارے کے عملے میں سے زندہ بچ جانے والوں کی تلاش میں الرٹ رہیں۔

دوسری جانب سوشل میڈیا پر ایسی تصاویر کی بھرمار ہے جن کے بارے میں دعویٰ کیا جا رہا ہے کہ وہ تباہ شدہ امریکی طیارے کا ملبہ ہیں۔

ایک امریکی اہلکار نے بتایا کہ گرایا جانے والا طیارہ ایف-15 فائٹر جیٹ تھا۔

کنٹیسٹڈ گراؤنڈ کے فرانزک امیجری اینالسٹ ولیم گڈ ہند کا کہنا ہے کہ سوشل میڈیا پر پوسٹ کی گئی تصاویر میں نظر آنے والے طیارے کے پچھلے حصے کے نشانات ایف-15 ای اسٹرائیک ایگل سے مطابقت رکھتے ہیں جس میں عملے کے دو ارکان سوار ہوتے ہیں۔

ایران کی نیم سرکاری نیوز ایجنسی اسنا کے مطابق صوبہ کہگیلویہ و بویر احمد کے گورنر نے اعلان کیا ہے کہ جو کوئی بھی طیارے کے عملے کو گرفتار کرے گا یا ہلاک کرے گا، اسے خصوصی اعزاز سے نوازا جائے گا۔

یہ واقعہ امریکی صدر ڈونلڈ ٹرمپ کی جانب سے ایران کو بمباری کے ذریعے پتھر کے دور میں واپس بھیجنے کی دھمکیوں کے بعد پیش آیا ہے۔ صدر ٹرمپ نے ایران کے توانائی کے بنیادی ڈھانچے اور پانی صاف کرنے کے پلانٹس پر حملے کی دھمکی دی ہے تاکہ تہران پر امریکی شرائط پر جنگ ختم کرنے کے لیے دباؤ ڈالا جا سکے۔

امریکی سینٹرل کمانڈ کے مطابق اس تنازع میں اب تک 13 امریکی فوجی ہلاک اور 300 سے زائد زخمی ہو چکے ہیں۔ تاہم، ابھی تک کوئی بھی امریکی فوجی ایران کی قید میں نہیں ہے۔

اگرچہ صدر ٹرمپ بارہا ایرانی فوج کو شکست خوردہ ظاہر کرنے کی کوشش کرتے رہے ہیں، لیکن رائٹرز نے امریکی انٹیلی جنس کے حوالے سے رپورٹ دی ہے کہ ایران کے پاس اب بھی بڑی تعداد میں میزائل اور ڈرون حملوں کی صلاحیت موجود ہے۔