عراق نے ہرمز میں خلل ڈالنے پر غیر ملکی آئل فیلڈز پر فورس میجر کا اعلان کر دیا ہے، ذرائع

براہِ راست معلومات رکھنے والے تین توانائی حکام کے مطابق خطے میں فوجی کارروائیوں کے باعث آبنائے ہرمز سے جہاز رانی متاثر ہونے اور ملک کی زیادہ تر خام تیل برآمدات رک جانے کے بعد عراق نے غیر ملکی آئل کمپنیوں کے تیار کردہ تمام آئل فیلڈز پر فورس میجر کا اعلان کر دیا ہے۔

وزارتِ تیل نے 17 مارچ کو لکھے گئے ایک خط میں، جسے رائٹرز نے دیکھا ہے، کہا گیا ہے کہ آبنائے ہرمز، جہاں سے عالمی سطح پر تقریباً 20 فیصد تیل اور مائع قدرتی گیس ( ایل این جی ) کی ترسیل ہوتی ہے، غیر معمولی فوجی سرگرمیوں کے باعث شدید متاثر ہوئی ہے۔ خط میں مزید کہا گیا ہے کہ عراقی خام تیل کی زیادہ تر برآمدات اسی راستے سے گزرتی ہیں، اور اس خلل کے باعث ذخیرہ کرنے کی گنجائش اپنی حد تک پہنچ چکی ہے۔

جمعہ کے روز عالمی تیل کی قیمتیں تقریباً چار برس کی بلند ترین سطح پر بند ہوئیں، کیونکہ امریکا اور اسرائیل کی جانب سے ایران کے خلاف تین ہفتوں سے جاری جنگ میں شدت آ گئی ہے۔

خط میں کہا گیا ہے کہ ”بین الاقوامی شراکت دار خام تیل اٹھانے کے لیے ٹینکر نامزد کرنے سے قاصر رہے، جس کے باعث برآمدات رک گئیں، حالانکہ سرکاری آئل کمپنی سومو (ایس او ایم او) کھیپ لوڈ کرنے کے لیے تیار تھی۔“

مزید کہا گیا ہے کہ ”صورتحال کے پیشِ نظر متعلقہ وزارت نے متاثرہ کنسیشن علاقوں میں پیداوار مکمل طور پر بند کرنے کا حکم دیا ہے، اور معاہدے کی شرائط کے تحت اس اقدام پر کسی قسم کا معاوضہ واجب نہیں ہوگا۔“

وزارت کے مطابق خطے کی صورتحال کے مطابق اس کمی یا بندش کا وقتاً فوقتاً جائزہ لیا جائے گا، اور کمپنیوں کو ہنگامی مذاکرات کی دعوت دی گئی ہے تاکہ فورس میجر( غیر معمولی حالات میں معاہدے کی عدم پاسداری پر ذمہ داری سے استثنیٰ) کی صورتحال میں ضروری آپریشنز، اخراجات اور عملے سے متعلق امور پر اتفاق کیا جا سکے۔

وزارت کے جمعہ کو جاری بیان کے مطابق عراقی وزیرِ تیل حیان عبدالغنی نے کہا ہے کہ بصرہ آئل کمپنی میں خام تیل کی پیداوار 33 لاکھ بیرل یومیہ سے کم ہو کر 9 لاکھ بیرل یومیہ رہ گئی ہے، کیونکہ ملک کی جنوبی بندرگاہوں سے برآمدات معطل ہو چکی ہیں۔ بیان میں کہا گیا ہے کہ پیدا ہونے والی مقدار کو ریفائنریز چلانے کے لیے استعمال کیا جا رہا ہے۔

پیداوار اور برآمدات میں یہ کمی عراق کی پہلے سے کمزور مالی حالت پر دباؤ ڈالے گی، کیونکہ ریاست اپنے تقریباً تمام سرکاری اخراجات اور 90 فیصد سے زائد آمدن کے لیے خام تیل کی فروخت پر انحصار کرتی ہے۔

امریکا اوراسرائیل کی ایران کے خلاف جنگ پہلے ہی ایران کی سرحدوں سے باہر پھیل چکی ہے؛ تہران نے جواباً اسرائیل اور خلیجی عرب ممالک کو نشانہ بنایا ہے جہاں امریکی فوجی تنصیبات موجود ہیں، جبکہ ایران کے حمایت یافتہ حزب اللہ کی سرحد پار فائرنگ کے بعد اسرائیل نے لبنان میں نئے حملے بھی کیے ہیں۔