مشرقِ وسطیٰ میں بڑھتی کشیدگی کے دوران وزیرِ خارجہ اسحاق ڈار ہنگامی اجلاس میں شرکت کے لیے ریاض پہنچ گئے

دفتر خارجہ (ایف او) نے بدھ کو اعلان کیا ہے کہ نائب وزیراعظم اور وزیر خارجہ اسحاق ڈار عرب اور اسلامی وزرائے خارجہ کے ہنگامی اجلاس میں شرکت کے لیے ریاض پہنچ گئے ہیں۔

اعلیٰ سطح کا یہ اجلاس سعودی عرب کی طرف سے بلایا گیا ہے اور اس کا مقصد خطے میں تیزی سے بدلتی ہوئی صورتحال کے تناظر میں سلامتی اور استحکام کو مضبوط بنانے کے اقدامات تلاش کرنا ہے۔

دفتر خارجہ کے مطابق اجلاس میں اسحاق ڈار پاکستان کی جانب سے فوری جنگ بندی کے مطالبے کا اعادہ کریں گے اور جاری تنازعات کے حل میں مذاکرات اور سفارت کاری کی اہمیت پر زور دیں گے۔

اجلاس کے دوران وزیرِ خارجہ متوقع طور پر خطے کے ممالک کی علاقائی سالمیت، خودمختاری اور سیاسی آزادی کے لیے پاکستان کے مضبوط موقف کا اعادہ کریں گے اور ان کے علاقوں پر حملوں کے خاتمے کا مطالبہ کریں گے۔

وزیرِ خارجہ اس دوران پاکستان کی جاری سفارتی کوششوں اور خراب ہوتی ہوئی سلامتی کی صورتحال کے حل میں تعمیری کردار ادا کرنے کی رضامندی کو بھی اجاگر کریں گے۔

یہ ہنگامی اجلاس مشرق وسطیٰ میں بڑھتے ہوئے تنازعات کے پس منظر میں منعقد ہو رہا ہے، جو امریکی اور اسرائیلی حملوں کے بعد ایران کے اہداف پر کیے گئے ہیں۔ ان حملوں کے جواب میں میزائل اور ڈرون حملوں نے خدشات بڑھا دیے ہیں کہ خطے میں وسیع پیمانے پر جنگ عالمی توانائی کے اہم راستوں میں خلل ڈال سکتی ہے۔

ایران نے اعلیٰ حکام بشمول سیکورٹی چیف علی لاریجانی اور بسیج کمانڈر غلام رضا سلیمانی کی شہادتوں کی تصدیق کے بعد سخت جواب دینے کا عندیہ دیا، جس سے کشیدگی مزید بڑھ گئی۔

متعدد ممالک کے خدشات کے پیش نظر، ریاض اجلاس کو ایک اہم سفارتی کوشش کے طور پر دیکھا جا رہا ہے تاکہ مزید کشیدگی کو روکا جا سکے اور خطے میں استحکام بحال کیا جا سکے۔