پاکستان اور افغانستان کشیدگی مذاکرات کے ذریعے حل کریں، چین کا پیغام

چینی وزیر خارجہ وانگ یی نے اپنے افغان ہم منصب امیر خان متقی سے فون پر گفتگو میں کہا ہے کہ پاکستان اور افغانستان کے درمیان اختلافات کو طاقت کے ذریعے نہیں بلکہ بات چیت اور مشاورت کے ذریعے حل کیا جانا چاہیے، یہ بات جمعہ کو چینی وزارت خارجہ کے بیان میں سامنے آئی ہے۔

بیان کے مطابق وانگ نے دونوں فریقین سے پرامن رہنے، ضبط و تحمل اختیار کرنے، جلد از جلد آمنے سامنے مذاکرات کرنے، فوری جنگ بندی کو یقینی بنانے اور اختلافات کو گفت و شنید سے حل کرنے کی تاکید کی۔

وانگ نے کہا کہ تنازع میں مزید طاقت کے استعمال سے صورتحال مزید پیچیدہ ہوگی اور کشیدگی شدت اختیار کر جائے گی۔

چینی وزارت خارجہ کے بیان میں کہا گیا ہے کہ یہ موقف اس کے بعد سامنے آیا جب جمعہ کو پاکستان نے افغانستان کے قندھار ایئرپورٹ کے قریب نجی ایئر لائن کام ایئر کے فیول ڈپو پر بمباری کی، جس سے پڑوسی ممالک کے درمیان کئی برسوں میں سب سے شدید تنازع بڑھ گیا۔

بیان کے مطابق وانگ یی اور امیر خان متقی نے ایران کی صورتحال پر بھی تبادلہ خیال کیا۔

بیان کے مطابق وانگ نے متقی کو بتایا کہ بیجنگ بین الاقوامی برادری، بشمول افغانستان، کے ساتھ مل کر ایران میں امن قائم کرنے کے لیے تعاون کرنے کا خواہاں ہے۔