افغان طالبان کے ڈرونز کو سافٹ اور ہارڈ کل ٹیکنالوجی کے ذریعے فضا میں تباہ کردیا، آئی ایس پی آر

پاک فوج کے شعبہ تعلقات عامہ (آئی ایس پی آر) نے کہا ہے کہ افغان طالبان نے پاکستان کے بہادر عوام کو ہراساں کرنے کیلئے غیر ترقی یافتہ (ابتدائی) نوعیت کے ڈرونز حملے کئے ،ان ڈرونز کو سافٹ اور ہارڈ کل ٹیکنالوجی کے ذریعے روک کر تباہ کردیا گیا اور انہیں اپنے مطلوبہ اہداف تک نہیں پہنچنے دیا گیا۔

تاہم ان ڈرونز کا ملبہ گرنے سے کوئٹہ میں دو بچے جبکہ کوہاٹ اور راولپنڈی میں ایک ایک شہری زخمی ہوا۔

آئی ایس پی آر نے جمعہ کو ہونے والی سرحد پار اشتعال انگیزی کے حوالے سے آج جاری کردہ ایک بیان میں یہ تفصیلات بتائیں۔

آئی ایس پی آر سے ہفتے کو جاری پریس ریلیز کے مطابق ان حملوں کا مقصد عوام میں خوف و ہراس پیدا کرنا تھا جو ہمیں افغان طالبان کی دہشت گردانہ ذہنیت کی یاد دلا تا ہے اور یہ افغان طالبان کی میراث ہے۔ آئی ایس پی آر نے کہا ہے کہ ایک جانب افغان طالبان عالمی ہمدردی حاصل کرنے کے لئے خود کو مظلوم ظاہر کرتے ہیں جبکہ دوسری جانب وہ اپنی دہشت گرد پراکسیز اور ڈرونز کے ذریعے عام شہریوں کو نشانہ بناتے ہیں۔

آئی ایس پی آر نے واضح کیا ہے کہ پاکستان کے عوام اور مسلح افواج افغانستان پر حکمرانی کرنے والی دہشت گرد ملیشیا کی اصل فطرت اور عزائم سے بخوبی آگاہ ہیں۔

آئی ایس پی آر کے مطابق پاکستان کا آپریشن ’غضب للحق دہشتگردی کے مکمل خاتمہ تک جاری رہے گا اور جب تک افغان طالبان پاکستان کے خلاف دہشتگردی بند نہیں کرتے کارروائیاں جاری رہیں گی۔

آئی ایس پی آر نے واضح کیا ہے کہ پاکستان کی مسلح افواج افغان طالبان کے ڈرون حملوں سمیت کسی بھی قسم کی دہشت گردی اور اس کے مظاہر کے خلاف جنگ میں ثابت قدم ہیں، ہم دہشت گردوں اور ان کے سہولت کاروں کے خلاف پاکستانی عوام کا دفاع کرتے رہیں گے اور افغان طالبان کی اس طرح کی اشتعال انگیزیوں کے سامنے نہیں جھکیں گے۔