ایئر لنک کی ذیلی کمپنی سلیکٹ ٹیکنالوجیز کا آئی پی او لانے کا فیصلہ

پاکستان کی ٹیکنالوجی فرم ایئر لنک کمیونیکیشن لمیٹڈ نے جمعہ کو بتایا کہ اس کی ملکیتی ذیلی کمپنی سلیکٹ ٹیکنالوجیز لمیٹڈ نے انیشل پبلک آفرنگ (آئی پی او) لانے اور پاکستان اسٹاک ایکسچینج (پی ایس ایکس) میں لسٹنگ حاصل کرنے کا ارادہ ظاہر کیا ہے۔

ٹیکنالوجی فرم نے جمعہ کو اسٹاک ایکسچینج کو بھیجے گئے ایک نوٹس میں اس پیشرفت سے آگاہ کیا۔

نوٹس کے مطابق ایئر لنک کمیونیکیشن لمیٹڈ کے بورڈ آف ڈائریکٹرز یہ اعلان کرتے ہوئے خوشی محسوس کررہے ہیں کہ اس کی مکمل ملکیتی ذیلی کمپنی، سلیکٹ ٹیکنالوجیز لمیٹڈ نے آئی پی او کے ذریعے سرمایہ اکٹھا کرنے اور پاکستان اسٹاک ایکسچینج میں اپنی سیکیورٹیز کی لسٹنگ حاصل کرنے کا فیصلہ کیا ہے۔

کمپنی کا آئی پی او تمام متعلقہ قوانین، قواعد اور ضوابط کی تعمیل سے مشروط ہے۔

نوٹس میں مزید بتایا گیا کہ عارف حبیب لمیٹڈ کو اس مجوزہ آئی پی او کے لیے کنسلٹنٹ ٹو دی ایشو اور لیڈ منیجر مقرر کردیا گیا ہے۔

اس سے قبل جنوری میں سلیکٹ ٹیکنالوجیز لمیٹڈ نے عالمی سطح پر کنزیومر الیکٹرانکس کی بڑی کمپنی ہائیسنس کے ساتھ ایک اسٹریٹجک شراکت داری کا اعلان کیا تھا جس کا مقصد پاکستان میں گھریلو استعمال کی اشیاء کی مقامی سطح پر تیاری اور تقسیم کو یقینی بنانا ہے۔

ایئرلنک کمیونیکیشن لمیٹڈ کو جنوری 2014 میں پاکستان میں ایک پرائیویٹ لمیٹڈ کمپنی کے طور پر رجسٹر کیا گیا تھا جس کے بعد اپریل 2019 میں اسے پبلک لمیٹڈ کمپنی میں تبدیل کر دیا گیا۔

کمپنی کمیونیکیشن اور آئی ٹی سے متعلقہ مصنوعات اور خدمات کی درآمد، برآمد، تقسیم (ڈسٹری بیوشن)، شناخت، ہول سیل اور ریٹیل کے کاروبار سے وابستہ ہے۔ ان مصنوعات میں اسمارٹ فونز/سیلولر فونز، ٹیبلٹس، لیپ ٹاپ، لوازمات (ایسیسریز) اور دیگر متعلقہ اشیاء شامل ہیں۔