کے پی حکومت کا پیٹرولیم قیمتوں میں اضافے کے بعد موٹر سائیکل سواروں کے لیے فیول سبسڈی کا اعلان

وفاقی حکومت کی جانب سے پیٹرولیم مصنوعات کی قیمتوں میں بڑے اضافے کے بعد خیبر پختونخوا کے وزیراعلیٰ محمد سہیل آفریدی نے صوبے کے ہر رجسٹرڈ موٹر سائیکل مالک کے لیے 2200 روپے سبسڈی کا اعلان کر دیا۔

اس مالی امداد کا مقصد حالیہ 55 روپے فی لیٹر اضافے کے اثرات کو کم کرنا ہے، جو تقریباً 15 لاکھ رجسٹرڈ بائیک مالکان کو 40 لیٹر پیٹرول کے مساوی ریلیف فراہم کرے گی۔ یہ سبسڈی دو مراحل میں تقسیم کی جائے گی، پہلی قسط میں 1100 روپے فوری طور پر منتقل کیے جائیں گے، جبکہ بقیہ 1100 روپے دوسری قسط میں دیے جائیں گے۔

مشیر خزانہ مزمل اسلم کے ہمراہ پریس کانفرنس کرتے ہوئے وزیراعلیٰ آفریدی نے پیٹرول کی قیمتوں میں اضافے کو عوام پر معاشی بم اور ظلم قرار دیتے ہوئے اسے یکسر مسترد کر دیا۔ انہوں نے کہا کہ صوبائی حکومت اپنے شہریوں کو عالمی سپلائی میں تعطل اور بڑھتی ہوئی مہنگائی سے بچانے کے لیے پرعزم ہے۔ اس سبسڈی کے علاوہ پشاور بی آر ٹی اور دیگر پبلک ٹرانسپورٹ کے کرایوں میں کوئی اضافہ نہ کرنے کا بھی اعلان کیا گیا۔

وزیراعلیٰ نے وفاقی حکومت پر تنقید کرتے ہوئے کہا کہ جو پارٹیاں 12 روپے کے اضافے کو پیٹرول بم کہتی تھیں، آج انہوں نے 55 روپے کا بوجھ لاد دیا ہے۔ انہوں نے پنجاب حکومت کی جانب سے 11 ارب روپے کا لگژری طیارہ خریدنے کے فیصلے کو ترجیحات کا غلط انتخاب قرار دیا اور بتایا کہ کے پی حکومت نے وزراء کی تنخواہوں میں اضافے اور نئی سرکاری گاڑیوں کی خریداری پر پابندی لگا کر اخراجات میں کمی کی ہے۔

انہوں نے ایندھن کی مینجمنٹ کے لیے اسپیشل پیٹرول مانیٹرنگ ڈیش بورڈ کے قیام کا بھی ذکر کیا جو پیٹرول پمپوں پر سپلائی اور اسٹوریج کی ریئل ٹائم نگرانی کرے گا، تاکہ مصنوعی قلت کو روکا جا سکے۔ خواتین کے عالمی دن کے موقع پر انہوں نے بی آر ٹی نیٹ ورک میں خواتین کے لیے مخصوص ’پنک بسیں‘ چلانے اور گندم کی کٹائی کے سیزن کے لیے کسانوں کے لیے خصوصی ریلیف پیکج کا بھی اعلان کیا۔

مزمل اسلم نے ٹیکسوں کی تفصیل بتاتے ہوئے کہا کہ لیوی کو 86 روپے سے بڑھا کر 105 روپے کر دیا گیا ہے۔ انہوں نے انکشاف کیا کہ حکومت نے رواں مالی سال کے پہلے سات ماہ میں پیٹرولیم لیوی کی مد میں 822 ارب روپے جمع کیے ہیں اور سال کے آخر تک یہ رقم 1700 ارب روپے تک پہنچنے کی توقع ہے۔