ایچ بی ایل پی ایس ایل کے ٹی وی براڈکاسٹ اور لائیو اسٹریمنگ حقوق کے لیے خطیر رقم کی بولی

پاکستان کرکٹ بورڈ (پی سی بی) نے ایچ بی ایل پی ایس ایل (2026-29) کے میڈیا حقوق کے ٹینڈر کے کامیاب اختتام کا اعلان کر دیا ہے، جس میں پاکستان کرکٹ کی تاریخ کی سب سے بڑی مالی پیشکش سامنے آئی۔ ولی ٹیکنالوجیز نے پی سی بی کی مقرر کردہ ریزرو قیمت سے کہیں زیادہ 26.11 ارب روپے کی بے مثال بولی دے کر ٹی وی براڈکاسٹ اور لائیو اسٹریمنگ کے حقوق حاصل کر لیے ہیں۔

یہ چار سالہ معاہدہ پی ایس ایل کے 2026 سے 2029 تک کے ایڈیشنز کا احاطہ کرے گا، جو لیگ کی بڑھتی ہوئی تجارتی اہمیت اور برانڈ ویلیو کا منہ بولتا ثبوت ہے۔ پی ایس ایل کے سی ای او سلمان نصیر نے اسے پاکستان کرکٹ کی تاریخ کی سب سے بڑی ڈیل قرار دیتے ہوئے کہا کہ اس سے شائقین کو تمام پلیٹ فارمز پر جدید سہولیات کے ساتھ کرکٹ دیکھنے کا موقع ملے گا۔

ولی ٹیکنالوجی کے سی ای او محمد احسن طاہر کے مطابق یہ صرف ایک نشریاتی معاہدہ نہیں بلکہ ایک نئے ڈیجیٹل اسپورٹس ایکو سسٹم کی بنیاد ہے جہاں مداحوں، برانڈز اور پبلشرز سب کو ایک جگہ اکٹھا کیا جائے گا۔ یہ تاریخی معاہدہ پی ایس ایل کو خطے کی سب سے مقبول ٹی ٹوئنٹی پراپرٹی کے طور پر مستحکم کرتا ہے۔

کاپی رائٹ بزنس ریکارڈر2026