روس میں ٹیلی گرام کے بانی پاول دوروف کیخلاف تحقیقات

روس کی ریاستی خبر رساں ایجنسی روسیسکایا گزیتا کے مطابق، وفاقی سیکیورٹی سروس (ایف سی بی) بانی اور سی ای او ٹیلی گرام پاول دوروف کے خلاف دہشت گردانہ سرگرمیوں کی معاونت کے الزام میں فوجداری مقدمے کے تحت تحقیقات کر رہی ہے۔

رپورٹ کے مطابق دوروف سے فوری رابطہ نہیں ہوسکا، لیکن ٹیلی گرام نے حالیہ دنوں میں روس کی جانب سے عائد کردہ متعدد الزامات کی تردید کی ہے کہ یہ ایپ جرائم پیشہ عناصر کے لیے محفوظ ہے اور مغربی اور یوکرائنی انٹیلی جنس کے زیر اثر ہے۔

روسیسکایا گزیتا نے اپنی رپورٹ میں کہا کہ ٹیلی گرام کے سربراہ کے اقدامات کو روس کے فوجداری قانون کے آرٹیکل 205.1 کے حصہ 1.1 کے تحت دہشت گردانہ سرگرمیوں کی معاونت کے جرم کے تناظر میں تحقیقات کا حصہ بنایا گیا ہے۔“

ٹیلی گرام کے بقول اس کے دنیا بھر میں ایک ارب سے زائد فعال صارفین ہیں، اور اس نے فوری طور پر روئٹرز کی رپورٹ پر تبصرہ نہیں کیا۔ روس کی ریاستی کمیونیکیشن ریگولیٹر نے ٹیلی گرام پر پابندیاں عائد کی ہیں، کیونکہ کمپنی نے انتہا پسندی سے متعلق مواد کو حذف کرنے میں ناکامی کا مظاہرہ کیا ہے۔

ماسکو شہریوں کو ریاستی معاونت یافتہ ایپ ایم اے ایکس پر منتقل کرنے کی کوشش کر رہا ہے، جو تقریباً ایک سال قبل متعارف کروائی گئی تھی۔ ٹیلی گرام روس میں عوامی اور نجی رابطوں کے لیے بہت مقبول ہے، لیکن اب حکومت کی جانب سے نئے قواعد و ضوابط نافذ کیے گئے ہیں تاکہ مواد کی نگرانی ممکن ہو سکے۔