عوام کے لیے ماہانہ ای کھلی کچہری منعقد کی جائے، وزیراعلیٰ پختونخوا کا وزراء کو حکم

خیبر پختونخوا کے وزیر اعلیٰ محمد سہیل آفریدی نے تمام صوبائی وزراء اور مشیروں کو ہدایت کی ہے کہ وہ اپنے متعلقہ محکموں میں ماہانہ بنیادوں پر ای کھلی کچہریوں کا آغاز کریں۔

وزیر اعلیٰ نے ایک بیان میں کہا کہ عوام کا احساس فریم ورک کے تحت شروع کیے گئے اس اقدام کا مقصد شہریوں کو براہِ راست حکام تک رسائی فراہم کرنا ہے، تاکہ عوامی اعتماد بحال ہو اور شکایات کا شفاف حل یقینی بنایا جا سکے۔

یہ ہدایت 23 صوبائی محکموں اور ان سے منسلک 69 خود مختار یا نیم خود مختار اداروں تک پھیلا دی گئی ہے۔ تمام انتظامی سیکرٹریوں اور فیلڈ افسران کو پابند کیا گیا ہے کہ وہ یکم مارچ سے ان باقاعدہ ڈیجیٹل سیشنز کا آغاز کریں۔

پروگرام کی کامیابی اور تسلسل کو یقینی بنانے کے لیے ان ای کچہریوں کے ایس او پیز کے حوالے سے وزیر اعلیٰ سیکرٹریٹ میں ایک خصوصی آگاہی سیشن بھی منعقد کیا جائے گا۔

وزیر اعلیٰ سہیل آفریدی نے اس بات پر زور دیا کہ یہ سیشنز عوامی رابطے کو مؤثر بنانے اور گڈ گورننس و غیر جانبداری کی بنیادی اقدار کو فروغ دینے کی حکمت عملی کا اہم حصہ ہیں۔ اس نئے نظام کے تحت محکمے نہ صرف بروقت شکایات حل کرنے کے پابند ہوں گے بلکہ ہر سطح پر جوابدہی کو یقینی بنانے کے لیے ان کی کارکردگی کا سہ ماہی جائزہ بھی لیا جائے گا۔

وزیر اعلیٰ سہیل آفریدی کا مزید کہنا ہے کہ اس ڈیجیٹل پلیٹ فارم کے استعمال سے خیبر پختونخوا حکومت انتظامی اور پالیسی دونوں سطحوں پر عوامی مسائل پر فوری کارروائی کا ارادہ رکھتی ہے۔ ان کے مطابق یہ ای کچریاں نظامی رکاوٹوں کی نشاندہی کرنے اور عوام کو براہِ راست انصاف فراہم کرنے کے لیے ایک ضروری آلے کے طور پر کام کریں گی۔

انہوں نے مزید کہا کہ اس فعال طرزِ عمل سے شکایات کے ازالے کے عمل میں بہتری آئے گی اور صوبائی انتظامیہ شہریوں کی فوری ضروریات کے حوالے سے زیادہ جوابدہ بنے گی۔