باجوڑ میں دہشت گردوں کا حملہ، 11 سیکیورٹی اہلکار شہید، 12 خوارج ہلاک، آئی ایس پی آر

پاکستانی سیکیورٹی فورسز نے پیر کو ضلع باجوڑ میں مشترکہ چیک پوسٹ پر دہشت گردوں کا حملہ ناکام بناتے ہوئے 12 دہشت گردوں کو ہلاک کر دیا۔آئی ایس پی آر کے مطابق یہ حملہ بھارتی سرپرستی میں کام کرنے والی پراکسی فتنة الخوارج نے کیا۔

بیان کے مطابق مستعد جوانوں کے فوری اور بھرپور جواب کے باوجود حملہ آوروں نے بارود سے بھری گاڑی چیک پوسٹ کی حفاظتی دیوار سے ٹکرا دی۔ اس زوردار دھماکے کے نتیجے میں چیک پوسٹ کی عمارت منہدم ہوگئی، جس سے 11 سیکیورٹی اہلکار جامِ شہادت نوش کر گئے۔

اس دھماکے سے قریبی شہری مکانات کو بھی شدید نقصان پہنچا، جس کے نتیجے میں ایک کمسن بچی جاں بحق جبکہ خواتین اور بچوں سمیت سات شہری زخمی ہوئے۔ حملے کے بعد علاقے میں موجود ممکنہ دہشت گردوں کے خاتمے کے لیے سرچ آپریشن شروع کر دیا گیا ہے۔

آئی ایس پی آر نے اپنے بیان میں اعادہ کیا ہے کہ عزمِ استحکام کے تحت پاکستان سے غیر ملکی سرپرستی میں ہونے والی دہشت گردی کے خاتمے تک یہ مہم پوری قوت کے ساتھ جاری رہے گی۔

دوسری جانب صدر آصف علی زرداری اور وزیراعظم شہباز شریف نے باجوڑ میں فتنۃ الخوارج کے دہشت گردانہ حملے کی شدید مذمت کی ہے۔ صدر ٍنے شہداء کے بلندیِ درجات کی دعا کرتے ہوئے کہا کہ غیر ملکی پشت پناہی سے ہونے والی دہشت گردی کا خاتمہ اولین ترجیح ہے۔ وزیراعظم نے 11 سکیورٹی اہلکاروں اور ایک شہری کی شہادت پر رنج و غم کا اظہار کیا اور 12 دہشت گردوں کو جہنم واصل کرنے والی سکیورٹی فورسز کی بروقت کارروائی کو سراہا۔