کراچی میں مقابلہ، 4 دہشت گرد ہلاک، 2 سی ٹی ڈی اہلکار زخمی

کراچی کے علاقے شاہ لطیف ٹاؤن ملیر میں کاؤنٹر ٹیررازم ڈیپارٹمنٹ (سی ٹی ڈی) نے انٹیلی جنس معلومات پر مبنی کارروائی کے دوران 4 دہشت گردوں کو ہلاک کر دیا، جبکہ مقابلے میں دو اہلکار زخمی بھی ہوئے۔ حکام کے مطابق دہشت گردوں کی موجودگی کی اطلاع پر ایک مکان کا محاصرہ کیا گیا تو وہاں سے فائرنگ شروع ہو گئی۔ ہلاک ہونے والوں میں جلیل، نیاز اور ہمدان شامل ہیں جبکہ چوتھے کی شناخت کا عمل جاری ہے۔ جائے وقوعہ سے بم ڈسپوزل اسکواڈ نے آئی ای ڈیز، ڈیٹونیٹرز اور سرکٹس سمیت بھاری مقدار میں بارودی مواد برآمد کر کے اسے ناکارہ بنا دیا۔

وفاقی وزیر داخلہ محسن نقوی نے اس کامیاب آپریشن پر کراچی پولیس کی پیشہ ورانہ مہارت اور بہادری کو سراہتے ہوئے کہا کہ فورس نے دہشت گردوں کو ان کے عبرتناک انجام تک پہنچا کر بڑی کامیابی حاصل کی ہے۔ انہوں نے زخمی اہلکاروں کی جلد صحت یابی کے لیے دعا بھی کی۔

پاکستان میں گزشتہ برس دہشت گردی کے واقعات میں 34 فیصد اضافہ دیکھا گیا ہے۔ پاکستان انسٹی ٹیوٹ فار پیس اسٹڈیز(پی آئی پی ایس) کی رپورٹ کے مطابق سال 2025 میں دہشت گردی کے 699 واقعات رونما ہوئے جن میں 1,034 افراد جاں بحق ہوئے۔ سب سے زیادہ 413 حملے خیبر پختونخوا اور 254 بلوچستان میں ہوئے، جبکہ سندھ میں 21 واقعات ریکارڈ کیے گئے۔

دوسری جانب ایک رپورٹ میں دعویٰ کیا گیا ہے کہ اکتوبر 2025 میں پاک-افغان سرحد کی بندش کے بعد سرحد پار سے ہونے والے حملوں اور جانی نقصان میں نمایاں کمی آئی ہے۔ دسمبر میں دہشت گردانہ حملوں میں 17 فیصد تک کمی دیکھی گئی ہے، تاہم سرحد کی بندش سے تجارتی سرگرمیاں معطل ہیں۔