مضبوط ڈالر اور ایشیائی منڈیوں میں محدود کاروبار، سونے کی قیمتوں میں ایک فیصد کمی

عالمی منڈی میں سونے کی قیمتوں میں منگل کو ایک فیصد کمی ریکارڈ کی گئی جبکہ نئے قمری سال کی تعطیلات کے باعث ایشیائی منڈیوں میں محدود لین دین جاری رہا اور امریکی ڈالر کی مضبوطی نے بھی قیمتوں پر دباؤ ڈالا۔

اسپاٹ گولڈ 0110 جی ایم ٹی تک 0.9 فیصد کمی کے ساتھ 4,947.98 ڈالر فی اونس پر آ گیا، جبکہ سیشن کے آغاز میں اس میں ایک فیصد تک کمی دیکھی گئی تھی۔ اپریل ڈیلیوری کے لیے امریکی گولڈ فیوچرز 1.6 فیصد کم ہو کر 4,966.80 ڈالر فی اونس پر آگئے۔

امریکی ڈالر انڈیکس میں 0.2 فیصد اضافہ ہوا جس کے باعث دیگر کرنسیوں کے حامل سرمایہ کاروں کے لیے ڈالر میں قیمت رکھنے والا سونا مہنگا ہو گیا۔ چین، ہانگ کانگ، سنگاپور، تائیوان اور جنوبی کوریا کی منڈیاں قمری نئے سال کی تعطیلات کے باعث بند رہیں جبکہ امریکا میں یوم صدارت کی وجہ سے پیر کو کاروبار معطل رہا۔

ادھر امریکی صدر ڈونلڈ ٹرمپ نے کہا ہے کہ وہ ایران کے جوہری پروگرام پر امریکا اور ایران کے درمیان جنیوا میں ہونے والے مذاکرات میں بالواسطہ طور پر شامل ہوں گے اور ان کا ماننا ہے کہ تہران کسی معاہدے میں دلچسپی رکھتا ہے۔

دوسری جانب ایران کے وزیر خارجہ نے پیر کو اقوام متحدہ کے جوہری نگران ادارے کے سربراہ سے ملاقات کی۔ یہ ملاقات واشنگٹن اور تہران کے درمیان جوہری تنازع حل کرنے کی کوششوں کے تناظر میں ہوئی تاہم دونوں جانب سے کسی واضح سمجھوتے کے آثار سامنے نہیں آئے اور امریکی فوجی کارروائی کا خدشہ بھی برقرار ہے۔

دیگر قیمتی دھاتوں میں اسپاٹ چاندی 2.7 فیصد کمی کے ساتھ 74.51 ڈالر فی اونس پر آ گئی جبکہ اس سے قبل اس میں 3 فیصد سے زائد کمی دیکھی گئی تھی۔ پلاٹینم 0.8 فیصد کم ہو کر 2,025.05 ڈالر فی اونس اور پیلیڈیم 1.5 فیصد کمی کے ساتھ 1,698.10 ڈالر فی اونس پر آ گیا۔